Braziliya Prezidentinin oğluna ağır ittiham

Braziliyada ölkə Prezidenti Jair Bolsonarunun oğlu Flavio Bolsonaruya qarşı daha bir istintaq başladılıb.

Teleqraf.com xəbər verir ki, o, Rio-de-Janeyrodan deputat olduğu müddətdə onun üçün çalışmayanların adlarını ona tabe olan şəxslərin siyahısında qeyd etməsində şübhəli bilinir.

Bu barədə Rio-de-Janeyro prokurorluğu məlumat verib.

Müstəntiqlərin fikrinə görə, bu yolla Prezidentin oğlu həmin şəxslər üçün dövlətdən aldığı maaşları qeyri-qanuni şəkildə mənimsəyirdi.

Bu ilin fevralından 38 yaşlı Flavio Bolsonaru Federal Senatın deputatıdır.

Xatırladaq ki, bu ilin əvvəlində ona qarşı şübhəli bank əməliyyatları ilə bağlı istintaq başladılmışdı. Aidiyyatı qurumunun məlumatına görə, 2017-ci ilin iyun və iyul aylarında Prezidentin oğlunun hesabına 48 ayrı ödəniş şəklində ümumilikdə 96 min Braziliya realı (20800 avroya yaxın) daxil olub.

Hazırda işlə ölkənin Ali Məhkəməsi məşğul olur.