23 Sentyabr 13:54
4 600

“Bu gün Ermənistanla strateji müttəfiqi Rusiya arasındakı münasibətlər tarixin ən aşağı səviyyəsindədir”.

Teleqraf.com xəbər verir ki, bunu erməni siyasi ekspert Vigen Akopyan deyib.

O, Ermənistanın hərbi-siyasi və iqtisadi baxımdan tamamilə Rusiyadan asılı olduğunu bildirib:

“Ölkəmizdə Rusiyanın bazası fəaliyyət göstərir, demək olar ki, bütün silahları Rusiyadan alırıq. Nüvə elektrik stansiyaları da daxil olmaqla, bütün strateji obyektlər Rusiyanın nəzarəti altındadır. Amma hakimiyyət buna baxmayaraq və nəzərə almayaraq, Moskva ilə ortaq kanal tapmaq istəmir”.

Akopyan Ermənistan hakimiyyətinin Rusiyaya meydan oxumasının ölkəyə baha başa gələcəyini deyib:

“Rəsmi İrəvanın və ya rəsmi Moskvanın nə deməsindən asılı olmayaraq, strateji müttəfiqlə münasibətlərimizin tarixi minimum səviyyədə olduğunu görürük”

Ekspert Baş nazir Nikol Paşinyanın Belarus Prezidenti Aleksandr Lukaşenko kimi Rusiya ilə bazarlıq etməyə çalışdığını, lakin bunun uğursuz gediş olduğunu diqqətə çatdırıb:

“Siyasi bazarlığa başlamaq cəhdindən danışırıq. Bu zaman-zaman edilir. Paşinyan hakimiyyətə gəldikdən sonra yaşlı adamı (Lukaşenko) təqlid etməyə qərar verdi: tələblər irəli sürmək, ruslar və ya başqaları üçün problemlər yaratmaq və sonra ticarətə başlamaq. Ancaq hər zaman Belarusun Belarus olduğunu xatırlamaq lazımdır və bazarlıq etməyi də bacarmaq lazımdır. Alqı-satqı etmək üçün masanın üstündə bir şey olmalıdır”.

Akopyanın sözlərinə görə, Paşinyanın reytinqi aşağı düşdükcə, o qədər problemlər olacaq, cəmiyyət və hakimiyyət daxilində mərkəzdənqaçma meylləri güclənəcək:

“Birincisi, reytinqin daha da aşağı düşməsi, qərarların hamısının razılaşdırılmamasına və hər kəsin Paşinyanın verdiyi qərarlara görə cavabdeh olmaq istəməməsinə gətirib çıxaracaq. İkincisi, müəyyən geosiyasi mərkəzlər burada fəaliyyətlərini gücləndirəndə hər kəs bu mərkəzlərin əks düşərgəsində olmaq istəməyəcək. Üçüncüsü, güc düşərgəsində, habelə cəmiyyətdə çatlar meydana gələcək.

Vigen Akopyan hakimiyyət daxilindəki gərginlikdən istifadə edən müxalifətin Paşinyana qarşı əlini gücləndirdiyini söyləyib:

“İndi müəyyən bir tarazlıq var: kifayət qədər zəif bir hökumət və güclənən bir müxalifət mövcuddur. Digər yandan, ölkədəki vəziyyət hakimiyyətin reytinqini yüksəltmək üçün ilkin şərtlər yaratmır. Müxalifətin potensialı artacaq, meyl belədir.

Paşinyan olduqca çətin bir seçim qarşısında qalıb. Həmişə olduğu kimi, pislə pis arasında seçim var. Bir tərəfdən də Paşinyana qarşı kifayət qədər ciddi təzyiqlər var, ətrafındakılardan kifayət qədər yaxın iki nəfərin istefasını tələb edirlər. Paşinyan düşünür ki, indi təzyiq altında öz adamlarını istefaya göndərsə, bu, zəiflik kimi qiymətləndiriləcək. Həm ictimai, həm də siyasi qüvvələr tərəfindən... Amma Paşinyan hakimiyyətini gücləndirmək naminə bu cür fiqurları qurban verməyə hazır şəxs kimi görünür. Amma bu addımı atsa, hər kəsi qurban verməyə hazır olduğunu düşünəcəklər. Bununla da Paşinyan özünü öz əli ilə “vura” bilər”.


Müəllif: Mənsur Rəğbətoğlu