Rusiyanın müharibə səbəbi saydığı ehtimal reallaşır – “Tezliklə...”

Böyük ehtimalla Ukraynanın müəyyən şərtlərlə NATO-ya daxil olması məsələsi pərdəarxası və ya qapalı şəkildə müzakirə olunur.

Teleqraf.com xəbər verir ki, bunu rusiyalı siyasi ekspert Mark Feyqin deyib.

Onun sözlərinə görə, Ukraynanın NATO-ya üzvlüyü qaçılmazdır və Rusiyanın buna hansısa formada təsir rıçaqları yoxdur:

“Müharibə rusların istifadə etdikləri son arqumentdir. Nüvə silahı? Bu, ikitərəfli müharibə məsələsi deyil. Bu qlobal məsələdir, ona görə də cəsarət etməyəcəklər. Bu üzvlüyün qarşısını almaq üçün hər şey edirlər”.

Feyqin qeyd edib ki, Ukrayna bu şərtlərlə dərhal NATO-ya qəbul edilə bilər:

“Məsələn, Ukrayna iyulda keçiriləcək sammitdə dərhal NATO-ya daxil ola bilər, amma ərazilərini tam azad etməyənə qədər beşinci maddə ona şamil edilməyəcək. Düşünürəm ki, bir neçə belə variant var. Həm bu, həm də Ukraynanın rəsmi Kiyevin nəzarətində olan hissəsinin NATO-ya qəbulu variantı. NATO zəmanətləri bu əraziyə şamil olunacaq, qalan ərazilərə yox, oradakı məsələ yalnız Ukraynanın özünün və onun Silahlı Qüvvələrinin səlahiyyətində olacaq. Belə də ola bilər. Ola bilsin ki, müzakirə olunur”.

Politoloq bildirib ki, əvvəllər belə qərarlar olmayıb, ona görə də bu məsələdə ən yüksək səviyyədə razılaşmanın olub-olmayacağını ehtimal etmək çətindir.

“Kim deyir ki, müharibə hər şeyi dəyişmir? Dəyişir. Baxın, 14 aylıq müharibə ərzində NATO hansı irəliləyişlərə nail olub: Stoltenberqin Üçüncü Dünya Müharibəsinə gətirib çıxarmamaq üçün heç bir şəkildə qarışmaq istəmədikləri barədə bəyanatlarından tutmuş, NATO-nun dəstəyi və Ukraynanın NATO-ya üzvlüyü ilə bağlı kifayət qədər kəskin və doğru bəyanatlara qədər. Bütün bunlar onu göstərir ki, irəliləyiş mümkündür. Deməli, bu üfüqün də o qədər də uzaqda olmadığını güman etmək olar: təhlükəsizlik zonasını təmin etmək üçün Ukrayna ərazisinə NATO qoşunlarının yeridilməsi və NATO-ya üzvlük”.