Ukrayna ordusundan əks hücum – Şiddətli döyüşlər gedir

Ukrayna ordusu Baxmut istiqamətində irəliləyib və hazırda cinahlarda döyüşlər davam edir.

Teleqraf.com xəbər verir ki, bu barədə Ukrayna Silahlı Qüvvələrinin Şərq Qrupunun sözçüsü Sergey Çerevatıy məlumat verib.

“Baxmut istiqamətində irəliləyişimiz var. Cinahlarda döyüşlər gedir, düşmənə təzyiq göstəririk. Müfəssəl təhlil və yoxlamadan sonra azad edə bildiyimiz ərazilər barədə ətraflı məlumat verəcəyik”, - o deyib.

Bildirilir ki, gün ərzində Baxmut istiqamətində artıq 23 toqquşma baş verib. Çerevatının sözlərinə görə, işğalçılar ciddi müqavimət göstəriblər, lakin Ukrayna hərbçiləri bir gündə 116 işğalçını məhv edib, daha 119 nəfəri yaralayıblar. Düşmənin onlarla texnikası da sıradan çıxarılıb.

Qeyd edək ki, Ukrayna Silahlı Qüvvələrinin Baş Qərargahının məlumatına görə, son sutka ərzində cəbhədə 46 toqquşma baş verib. Rusiya qüvvələri Liman, Baxmut və Maryinski istiqamətlərində cəmləşirlər.

Ukrayna hərbçiləri isə Baxmut, Berdyansk və Melitopol istiqamətlərində irəliləyirlər. Müdafiəçilərin müəyyən uğurları var.//oxu.az