Berlində etirazçılarla toqquşmalarda 13 polis xəsarət alıb

Almaniyanın paytaxtı Berlin şəhərində etirazçılarla toqquşmalarda 13 polis əməkdaşı xəsarət alıb. APA-nın “RİA Novosti”yə istinadən verdiyi xəbərə görə, polisin məlumatına əsasən, qarşıdurma zamanı 40 nəfər saxlanılıb.

Xəbər verildiyi kimi, ötən gün Berlində Almaniya kansleri Angela Merkelin yürütdüyü siyasətə qarşı kütləvi etiraz aksiyası keçirilib. Aksiya iştirakçıları əsasən kanslerin miqrant qəbulu ilə bağlı yürütdüyü siyasətə qarşı olduqlarını bəyan ediblər. Berlinin əsas küçə və yollarını bağlayan təxminən min nəfərə yaxın etirazçı yol boyunca “Merkel getməlidir!” şüarı səsləndiriblər.

Aksiyada daha çox “Almaniya üçün alternativ” partiyasının üzvləri və radikal sağçılar iştirak edib.

Buna paralel olaraq “Dünyaya açıq və tolerant Berlin” şüarı altında solçuların aksiyası keçirilib. Aksiyada 7 min nəfər iştirak edib.

Etirazçı qrupları arasında toqquşmanın qarşısını almaq məqsədilə polis gözyaşardıcı qazdan istifadə etməyə məcbur olub. Etiraz aksiyaları zamanı 1 700-dən polis əməkdaşı asayişə nəzarət edib.