“Prezident Almaniyada çox ciddi mesajlar verdi” - ŞƏRH

Azərbaycan prezidenti İlham Əliyev iyunun 7-də Almaniyaya rəsmi səfəri zamanı Berlində bir sıra görüşlər keçirib. Görüşlərdə əsasən iqtisadi əməkdaşlıq və Qarabağ məsələsi müzakirə olundu. Berlində Azərbaycan-Almaniya İqtisadi Forumunun açılışının olması, “Cənub Qaz Dəhlizi” layihəsi ilə bağlı müzakirələr, Ermənistanın Dağlıq Qarabağ münaqişəsilə bağlı status-kvonu saxlaması, BMT Təhlükəsizlik Şurasının qətnamələrini icra edilməməsilə bağlı Berlində ciddi mesajlar verildi.

Almaniya kansleri Angella Merkellə keçirilən görüş və görüşdən sonrakı brifinqdə də əsas müzakirələr, açıqlamalar Dağlıq Qarabağ münaqişəsi ilə bağlı oldu.

Prezidentin Almaniya səfəri Qərb mətbuatı tərəfindən də maraqla izlənilib. Qeyd olunur ki, Almaniya Bundestaqının qondarma erməni soyqırımı ilə bağlı qətnamə qəbul etməsindən sonra bu cür səfərin gerçəkləşməsi olduqca ciddi siyasi əhəmiyyat daşıyır.

Ölkə başçısının Almaniya səfərini qiymətləndirmək üçün Azərbaycan Respublikasının Prezidenti yanında QHT-lərə Dövlət Dəstəyi Şurasının üzvü, Beynəlxalq Münasibətlərin Araşdırılması Mərkəzinin sədri Rufiz Qonaqova müraciət etdik.

Rufiz Qonaqova görə, indiki məqamda Azərbaycan prezidenti İlham Əliyevin Almaniyaya səfəri olduqca əhəmiyyətli idi: "Səfərin həm siyasi, həm də iqtisadi əhəmiyyəti oldu. Prezident Berlində Almaniya ictimaiyyətinə, Avropaya, ümumiyyətlə, dünya ictimaiyyətinə ciddi mesajlar verdi. Yüksək tribunlaradan, xüsusilə də, Dağlıq Qarabağ münaqişəsi, Ermənistanın işğalçılıq siyasətilə bağlı rəsmi çıxışların edilməsi olduqca vacibdir və böyük əhəmiyyətə malikdir. ATƏT-in Minsk Qrupunun üzvü kimi Almaniya Dağlıq Qarabağ münaqişəsinin həll edilməməsinə görə məsuliyyət daşıyır. Almaniya Azərbaycanın ərazi bütövlüyünü tanıyır, torpaqlarımızın işğal olunduğunu bəyan edib. Cənab prezident Almaniyada bir sıra məsələlərlə bağlı mövqeyini ortaya qoydu. Bütün bunlar onu göstərir ki, Azərbaycan xarici siyasətində müstəqildir".

R.Qonaqov hesab edir ki, Prezident İlham Əliyevin Merkellə görüşü bəzi anlaşılmazlıqlara aydınlıq gətirdi: "Ümumilikdə, bu görüş Azərbaycan - Almaniya münasibətlərinin yaxşılaşmasına xidmət edən səfərlərdən biri kimi tarixə düşdü. Bir müddət öncə işğalçı Ermənistanın başçısı Serj Sarkisyan Berlində Merkellə görüşmüşdü, orada bir sıra yalanlar danışmışdı. Prezident İlham Əliyevin Almaniya səfərində Sarkisyanın yalanlarını ifşa edildi. Hazırda Almaniya ATƏT-ə sədrlik edir. Bu ölkə Minsk Qrupunun fəaliyyətini aktivləşdirmək üçün konkret addımlar ata bilər. Brifinqdə Angela Merkel Dağlıq Qarabağ münaqişəsinin açarının Rusiyanın əlində olduğunu dedi. Amma bu, o demək deyil ki, Avropa ölkələri proseslərə seyrici yanaşmalıdırlar. Ukrayna və Gürcüstana göstərilən diqqət Azərbaycan üçün də sərgilənməlidir".

Politoloq bildirdi ki, Almaniya Minsk Qrupunun fəaliyyətini dəstəkləməklə kifayətlənməməlidir, eyni zamanda proseslərdə aktiv iştirak etməlidir: "Səfər zamanı diqqətimi çəkən məqamlardan biri də iki ölkə arasında iqtisadi əməkdaşlığın yüksələn xətt üzrə artması üçün potensialın olmasıdır: "Merkel brifinqdə bildirdi ki, alman fondları yenidən Azərbaycanda işləyəcəyinə ümid edir. Düşünürəm ki, alman investorları üçün Azərbaycanda cəlbedici mühit var. Biz yaxın gələcəkdə prezidentin Almaniya səfərinin əhəmiyyətli nəticələrinin şahidi olacağıq”.

Ayxan