“Erməni xalqı buna görə Paşinyana qarşı ayağa qalxmır” - Millət vəkili

Bu gün Ermənistanda Nikol Paşinyana qarşı əsas mübarizə aparan əslində Serj Sərksiyan və Robert Köçəryanın tərəfdarlarıdır. Onların əllərində böyük maliyyə, media imkanları var. Eləcə də tərəfdarlarını səfərbər etmək üçün resursları var. Ancaq problem ondadır ki, Sərksiyan və Köçəryan ermənilərin yaddaşında elə mənfi imic qoyublar ki, bu gün xalq Paşinyana qarşı ayağa qalxmır. Bilirlər ki, Paşinyanı hakimiyyətdən qovduqları təqdirdə bu yaramazlar iqtidarı ələ keçirəcəklər.

Bu fikirləri Teleqraf.com-a Milli Məclisin deputatı Rasim Musabəyov Sarksiyan-Koçaryan cütlüyünün Ermənistanda hakimiyyətə gəlmək üçün atdığı revanşist addımları şərh edərkən deyib.

Musabəyov bildirib ki, əgər bu cinayətkar birlik hakimiyyəti ələ keçirsə, heç kimə yer qalmayacaq:

“Odur ki, Paşinyan və hökumətinə qarşı bu şəxslər təzyiq kampaniyası təşkil edə biliblər, amma yıxa bilmirlər. Səbəb odur ki, erməni xalqı onlara nifrət edir”.

Deputat qeyd edib ki, Sərkisyan-Köçəryan cütlüyü hakimiyyət uğrunda mübarizə aparsalar da, əslində önə çıxmırlar:

“Onlar əsas məqsədi Paşinyanı yıxmaqdır. İndi məhz bu cütlük ortaya Vazgen Manukyanı çıxarıb. Manukyan Levon Ter-Petrosyan dövründən qalan kadrdır. Qarabağ klanı ilə bağlı şəxsdir. Amma nə Sərksiyan, nə də Köçəryanın özü irəli çıxmır. Onlar düşünürlər ki, Paşinyanı qovduqdan sonra öz adamlarını hökumətdə yerləşdirsinlər, sonra isə maliyyə resurslarından istifadə etməklə parlamentdə çoxluğu təmin etsinlər”.

Millət vəkili Sərksiyan-Köçaryan tandeminin hakimiyyət uğrunda mübarizə apardığını desə də, onların hakimiyyətə gəlmə imkanlarını aşağı qiymətləndirir:

“Mən düşünmürəm ki, onlar hakimiyyətə gələ bilsinlər. Əlbəttə, xalqı ayağa qaldırıb Paşinyanı hakimiyyətdən qovmaq mümkündür. Ancaq özlərinin hakimiyyətə qayıtması erməni cəmiyyətində böyük nifrətə səbəb olacaq. Çünki onların erməni cəmiyyətində mənfi reytinqləri müsbət imiclərindən qat-qat çoxdur. Erməni xalqı belə şəxslərin hakimiyyətə qayıtmasını istəmir. Çünki əhali də, Robertin özü də bilir ki, canidir. Hər şeyə getməyə hazır adamdır. Odur ki, insanlar onu istəmir”.