“Məsələnin siyasi tərəfi həll edilib, Zəngəzur dəhlizi...” - Badalyan

Rusiya qoşunları Ermənistandan çıxsa, bütün Cənubi Qafqaz uzun müddət itiriləcək.

Teleqraf.com xəbər verir ki, bunu erməni politoloq Armen Badalyan deyib.

Onun sözlərinə görə, hazırkı məqamda Ermənistan rəhbərliyinin iki hədəfi var: Zəngəzur dəhlizinin açılması, xarici siyasi vektorun dəyişməsi - Ermənistan-Rusiya hərbi əlaqələrinin dayandırılması:

“Artıq bu kontekstdə KTMT və MDB ilə münasibətlər dondurulub. Məsələlərin siyasi tərəfi həll edilib, indi bunları reallaşdırmaq qalır”.

Badalyanın fikrincə, Rusiyadan uzaqlaşmaq Ermənistanın təhlükəsizliyi üçün ciddi problemlər yarada bilər:

“İrəvan təhlükəsizlik amilini nəzərə almadan Qərbə üz tutub. Rusiya da Ermənistan-Qərb münasibətlərini qəzəblə izləyir. Məsələn, bu gün Brüsseldə keçirililən görüş Rusiya üçün çox ağrılıdır. Rusiya tərəfi çox gözəl başa düşür ki, qoşunları Ermənistandan çıxsa, o zaman bütün Cənubi Qafqaz uzun müddət itiriləcək”.

Erməni ekspert istisna etmir ki, Rusiyanın Ermənistana qarşı tətbiq edəcəyi hazır planı var.