Azərbaycan və Gürcüstan XİN başçılarının müzakirə etdiyi məsələlər açıqlandı - Yeniləndi

Azərbaycan xarici işlər naziri Ceyhun Bayramov və gürcüstanlı həmkarı Maka Boçorişvili birgə mətbuat konfransı keçirir.

Teleqraf.com xəbər verir ki, XİN rəhbərləri təkbətək və geniş tərkibdə keçirilən görüşlərdən sonra mətbuata açıqlamalar verirlər.

***

16:25

Azərbaycan xarici işlər naziri Ceyhun Bayramov və gürcüstanlı həmkarı Maka Boçorişvilinin geniş tərkibdə görüşü başa çatıb.

Teleqraf.com xəbər verir ki, bu barədə Azərbaycan Xarici İşlər Nazirliyinin "X" sosial hesabında məlumat yayılıb.

Görüş çərçivəsində tərəflər Azərbaycan-Gürcüstan strateji tərəfdaşlığının siyasi, təhlükəsizlik, iqtisadi, enerji, nəqliyyat-kommunikasiya, humanitar, habelə regional və qarşılıqlı maraq doğuran beynəlxalq təhlükəsizlik məsələlərini müzakirə ediblər.

C.Bayramov həmkarına münaqişədən sonrakı yenidənqurma, minalardan təmizləmə və sülh səyləri, eləcə də davam edən sülh prosesində mövcud problemlər barədə məlumat verib.

Bir qədər sonra nazirlər mətbuat konfransı keçirəcək.

***

15:50

Azərbaycan xarici işlər naziri Ceyhun Bayramov və gürcüstanlı həmkarı Maka Boçorişvilinin təkbətək görüşü başa çatıb.

***

15:44

Gürcüstan xarici işlər naziri Maka Boçorişvilinin Azərbaycana 2 günlük rəsmi səfəri başlayıb.

Teleqraf.com xəbər verir ki, Azərbaycan xarici işlər naziri Ceyhun Bayramov gürcüstanlı həmkarını qarşılayıb.

Nazirlər arasında təkbətək görüş keçirilir. Sonra nazirlərin geniş tərkibdə görüşü nəzərdə tutulub.

Qeyd edək ki, bu, Boçorişvilinin XİN rəhbəri kimi ölkəmizə ilk rəsmi səfəridir.

Maka Boçorişvili Azərbaycan və Gürcüstan arasında iqtisadi əməkdaşlıq üzrə Hökumətlərarası Komissiyanın 10-cu iclasında iştirak edəcək.