“Dekoderləri aldığımız qiymətə satırıq, qiymət isə...”- “Azərpoçt”un baş direktoru

“Bakı və Abşeron yarımadasında analoq televiziya yayımının dayandırılmasından sonra yardımçı tədbir kimi “Azərpoçt”un filiallarında dekoderin satışı təşkil edilib. Həmin dekoderlər ticarət güzəşti əsasında distribütorlar tərəfindən “Azərpoçt”a təqdim edilən qiymətə satılır”.

Teleqraf.com-un məlumatına görə, bunu “Report”a açıqlamasında “Azərpoçt” MMC-nin baş direktor vəzifəsini icra edən Sübhan Kazımov deyib.

Direktor əvəzi bildirib ki, konfiqurasiyasından asılı olaraq müxtəlif modellər 35 manatadək satılır: “Dekoderləri distribütorlardan aldığımız qiymətə satırıq. Bildiyiniz kimi, poçt şöbələrində bu qurğuların münasib qiymətlə satışı yardımçı bir tədbirdir. Məqsəd dekoderlərin qiymətinin süni surətdə qaldırılmasının qarşısının alınmasıdır. Eyni zamanda əhalinin bu qurğulara olan tələbatının ödənilməsinə köməkdir. Modellərin qiymət fərqinə gəlincə, bu, dekoderlərin fərqliliyindən irəli gəlir”.

Sübhan Kazımovun sözlərinə görə, artıq Qobustan, Salyan və Xızı rayonlarına da dekoderlər göndərilib: “Noyabrın 20-dən sonra bütün rayonlara dekoderlər göndərməyi planlaşdırırıq. Dekoderlərin satışının poçtlarda təşkil olunmasının bir üstünlüyü də odur ki, “Azərpoçt”un Azərbaycan üzrə 1500-dən çox şöbəsi var. Bu şəbəkə imkan verir ki, qurğuların satışı vətəndaşlar üçün daha əlçatan olsun. Bakı üzrə 300-dən çox poçt şöbəsi fəaliyyət göstərir ki, onların hamısında satış həyata keçirə bilirik. Yalnız o poçtlarda satış həyata keçirilmir ki, həmin şöbənin kommersiya fəaliyyətinə icazəsi yoxdur”.

“Azərpoçt” rəsmisi onu da vurğulayıb ki, bir adama iki ədəddən artıq dekoder satılmasına qadağa qoyulub: “Bəzi şəxslər situasiyadan sui-istifadə edərək daha çox dekoder əldə edib əhaliyə baha qiymətə sata bilərlər”.