İqtisadçı tələbələr “Bank of Baku”da təcrübə keçəcək

Yqtisad İnstitutu ilə bank arasında müqavilə imzalandı

Azərbaycan Dövlət İqtisad Univeristeti ilə “Bank of Baku” arasında korporativ görüş keçirilib. Bu gün keçirilən tədbirin əsas məqsədi ali təhsil müəssisəsi ilə bank arasında ikitərəfli münasibətləri genişləndirmək, tələbə və müəllimlərin bank sektorundakı praktiki biliklərini artırmağa dəstək verməkdir.

Tədbiri giriş sözü ilə açan ADİU-nun rektoru Ədalət Muradov bildirib ki, korporativ sektorla münasibətlərin gücləndirilməsi tələbələrinin əmək bazarında layiqli mövqe tutmasına təkan verəcək. Qeyd edib ki, tələbələrin nəzəri biliklərlə yanaşı praktiki bacarıqlara yiyələnməsində bankın dəstəyindən istifadə olunacaq. Belə ki, müəllim və tələbələr praktiki biliklərini bankın potensialı vasitəsi ilə artıra biləcəklər.

ADİU-da hazırlanan kadrların bazarın tələblərinə tam uyğun yetişdirilməsi məqsədilə bank tərəfindən universitetin bir neçə tələbəsi üçün təqaüd proqramı nəzərdə tutulub. Tələbələrin seçimi univeristet ilə bank nümayəndələri tərəfindən aparılacaq. Bankın universitetə verəcəyi növbəti töhfə isə xüsusi auditoriyanın yaradılmasıdır. Auditoriyanın texniki təchizatı və tədris olunan fənlər üzrə kitablar da bank tərəfindən təmin olunacaq.

Vaxtilə ADİU-da təhsil almış "Bank of Baku"-nun İdarə Heyətinin sədri Fərid Hüseynov çıxışı zamanı bildirib ki, bankın əsas kadr aktivini məhz bu ali təhsil müəssisəsi təmin edir. Buna görə universitet ilə qarşılıqlı əlaqələrin artırılmasında maraqlı olduqlarını vurğulayıb.

Görüşün yekununda ADİU ilə “Bank of Baku” arasında “Əməkdaşlıq haqqında çərçivə razılaşması” barədə sənədin imzalanma mərasimi keçirilib.

NİGAR