BDU-da kadr dəyişikliyi: 4 nəfər yola salındı, təyinatlar oldu - Əmr/Yeni

Bakı Dövlət Universitetində növbəti kadr dəyişikliyi aparılıb.

Öz ərizəsi ilə vəzifəsindən azad edilən universitetin Elm və innovasiyalar üzrə keçmiş prorektoru, AMEA-nın müxbir üzvü, professor Aydın Kazımzadə rektorun elm və təhsil üzrə müşaviri vəzifəsinə təyinat alıb.

Bundan başqa, BDU-nun Ümumi məsələlər üzrə prorektor vəzifəsinə Mahir Hüseynov təyin edilib.

Biologiya fakültəsinin dekanı vəzifənin icrası dekan seçkilərinədək müvəqqəti olaraq fakültənin dosenti Çingiz Məmmədova həvalə edilib.

Elmi kitabxananın direktoru Sara İbrahimova öz ərizəsi əsasında tutduğu vəzifədən azad edilib. Kitabxananın direktoru vəzifəsinə Kitabxanaçılıq-informasiya fakültəsinin dosenti Nigar İsmayılova təyinat alıb./Report/

***

17:15

Bakı Dövlət Universitetinin (BDU) iki prorektoru işdən çıxarılıb.

Bununla bağlı müvafiq əmr imzalanıb.

Ali məktəbin Elm və innovasiyalar üzrə prorektoru, Fizika-riyaziyyat elmləri doktoru, professor, AMEA-nın müxbir üzvü Aydın Kazımzadə və Ümumi işlər üzrə prorektor Cəfər Eyvazov vəzifələrindən azad olunub.

BDU-nun Həmkarlar İttifaqı Komitəsinin sədri, fizika elmləri doktoru Hüseyn Məmmədov universitetin Elm və innovasiyalar üzrə prorektoru təyin olunub.

Bundan başqa, BDU-nun Biologiya kafedrasının dekanı, Əməkdar elm xadimi, professor Akif Quliyev işdən çıxarılıb.

Eyni zamanda BDU Həmkarlar İttifaqı Komitəsinin (HİK) növbəti iclası keçirilib.

Azərbaycan Təhsil İşçiləri Azad Həmkarlar İttifaqının (ATİAHİ) sədr müavini Mirzə Cəfərzadənin də iştirak etdiyi iclasda Həmkarlar İttifaqı Komitəsinin sədri Hüseyn Məmmədov hesabat xarakterli çıxış edib.

HİK İdarə Heyətinin üzvləri və fakültə sədrləri hesabata münasibət bildiriblər.

İclasda Komitənin sədri vəzifəsinə seçkilər keçirilib. Tarix fakültəsinin dekan müavini Rəşad Cabbarov HİK-in sədri seçilib./Report/