4 Avqust 2020 12:03
1 406
12 Punto 14 Punto 16 Punto 18 Punto

“Yaxşı olardı ki, bəzi çimərliklər insanları ailəvi, bəziləri isə tək-tək qəbul etsin”.

Bunu Teleqraf.com-a professor Adil Qeybulla deyib.

Professor qeyd edib ki, istənilən halda çimərliklər müəyyən təlimatlar əsasında fəaliyyət göstərməlidir: “Bilirik ki, çimərliklərin əksəriyyəti özəldir. Təlimatların başlıca göstəricisi ondan ibarət olmalıdır ki, çimərliklər insanları öz sahəsinə uyğun qəbul etsinlər. Bu məsələ sosial məsafənin gözlənilməsi baxımından aktualdır. Çünki insanlar dənizə girib çıxır, sahildə otururlar.

Məlumdur ki, insanlar dənizə ya ailəvi, ya da tək gedir. Bundan asılı olaraq bəzi müəyyənləşmələr aparılmalıdır. Yaxşı olardı ki, istirahətə gələnləri bəzi çimərliklər yalnız ailəvi, bəziləri isə tək-tək qəbul etsin. Çünki çimərliyin sahəsindən asılı olaraq insanlar sosial məsafəni gözləməlidirlər. Buna əsas prinsip kimi riayət olunmalıdır.

Çimərliklərdə dezinfeksiyaedici məhlullardan istifadə də yaxşı olardı. Açıq havada oturan və ya uzanan halda mümkün qədər bir-birilə məsafə saxlamaq məqsədəuyğundur. Çimərliklərdə xüsusi təhlükə yoxdur”.

Adil Qeybulla hesab edir ki, insanların çimərliyə necə gedəcəyi nəzərə alınmayıb: “Həftəsonu ictimai nəqliyyatın hərəkəti qadağan olunub, çox adamın da şəxsi avtomobili yoxdur. Buna görə çimərliklərə gediş-gəliş məsələsi nəzərə alınmalı idi.

İnsanların çoxu günəmuzd işləyir. Onlar adi günlərdə nəyləsə məşğul olurlar, amma sonra?! Həftəsonu çimərliyə necə getsinlər?! Məlumdur ki, çimərliyə piyada getmək mümkün deyil. Bu baxımdan bəzi nüanslar diqqətdən qaçıb.

Bir qrup tibb mütəxəssisi ilə Nazirlər Kabineti yanında Operativ Qərargaha göndərdiyimiz təkliflər paketində qeyd etmişdik ki, ilk növbədə təlimatlar hazılanmalıdır. Bu, çox mühümdür. İnsanların davranışları ilə bağlı təlimatlar olmasa, karantin qaydalarının yumşaldılması həmişə problem yarada bilər”.

Qeyd edək ki, Operativ Qərargahın məlumatına əsasən, avqustun 5-dən çimərliklərdən istifadəyə icazə veriləcək.


Müəllif: Yeganə Oqtayqızı