Həbsdən dustaq azad etdirən hüquq müdafiəçisi özü həbs edildi

Şirvan Apelyasiya Məhkəməsində dələduzluqda ittiham olunan hüquq müdafiəçisi Rasim Əlizadənin apelyasiya şikayəti üzrə məhkəmə prosesi başa çatıb.

Teleqraf.com xəbər verir ki, Rasim Əlizadə tamah məqsədi ilə 2012-ci ilin oktyabr ayında Kamran Əliyevin qardaşı Baş Prokurorluğunun Ağır Cinayətlərə dair İşlər üzrə İstintaq İdarəsində 22 sentyabr 2012-ci ildə Cinayət Məcəlləsinin 29,206.3.2 (qabaqcadan əlbir olan bir qrup şəxs tərəfindən qaçaqmalçılığa cəhd), 206.3.2 (qabaqcadan əlbir olan bir qrup şəxs tərəfindən qaçaqmalçılıq), 234.4.1 və 234.4.3-cü (qabaqcadan əlbir olan bir qrup şəxs tərəfindən külli miqdarda narkotik vasitələri əldə etmə, daşıma, saxlama və ya satma) maddələri ilə təqsirləndirilən şəxs qismində cəlb olunmuş və barəsində həbs qətimkan tədbiri seçilmiş Seyran Əliyevin həbsdən azad etmək imkanı olmasına inandırıb.

Rasim Əlizadə Kamran Əliyevi qardaşını həbsdən azad etmək adı ilə aldadıb və bu məqsədlə ondan Bakı şəhərində Hərbi hospitalın yaxınlığındakı “Papanin” kafesində 5000 manat, bundan bir müddət sonra, 2012-ci ilin oktyabr ayında Astara rayonunun Ərçivan kəndində 4000 manat və noyabr ayında həmin yerdə 6000 manat alıb.

Rasim Əlizadə Cinayət Məcəlləsinin 178.3.2-ci (etibardan sui-istifadə etməklə özgənin külli miqdarda əmlakını ələ keçirmə) maddəsi ilə ittiham edilib.

Rasim Əlizadə 2014-cü ilin noyabrın 7-də Bakı Ağır Cinayətlər Məhkəməsinin hökmü ilə 7 il müddətinə azadlıqdan məhrum edilib. Hökmdən narazı qalan Rasim Əlizadə apelyasiya şikayəti verib.

Bakı Apelyasiya Məhkəməsinin 1 fevral 2015-ci il tarixli qərarı ilə Rasim Əlizadənin barəsində olan hökm ləğv edilib və iş araşdırılması üçün yenidən apelyasiya instansiyasına qaytarılıb.

Rasim Əlizadə Bakı Ağır Cinayətlər Məhkəməsinin bütün tərkibinə etiraz verdiyi üçün işinə Lənkəran Ağır Cinayətlər Məhkəməsində baxılıb. Məhkəmənin hökmü ilə Rasim Əlizadənin barəsində Cinayət Məcəlləsinin 70-ci (şərti məhkum etmə) maddəsi tətbiq edilib və o, 5 il 1 ay 18 gün müddətinə şərti cəza alaraq məhkəmə zalından azadlığa buraxılıb.

Hökmdən narazı qalan Baş Prokurorluq apelyasiya protesti verib. Prokurorluq protestində Rasim Əlizadənin həbs edilməsini istəyib. Həmçinin Rasim Əlizadə də barəsində bəraət hökmünün çıxarılması barədə apelyasiya şikayəti verib.

Tərəflərin şikayətləri Şirvan Apelyasiya Məhkəməsində araşdırılıb. Apelyasiya şikayəti və protestinin dəlillərini araşdıran hakim heyəti sonda qərar elan edib.

Qərara görə, prokurorluğun protesti təmin edilib və Rasim Əlizadənin hökmündən Cinayət Məcəlləsinin 70-ci maddəsi xaric edilib. Məhkəmə Rasim Əlizadənin barəsində 5 il 1 ay 18 gün müddətinə azadlıqdan məhrum etmə cəzası təyin edib.

Onun barəsində həbs qəti imkan tədbiri seçilib və məhkəmə zalından həbs edilib.

Hacı Zeynalov