“MTN-ə 1 milyon 200 min verdim, çünki..." - "Çudo Peçka" işi/Yeni

Çudo Peçka və ÇP Aqro MMC-lərin təsisçisi Çingiz Cəlilov və Bank Standartın İdarə Heyətinin keçmiş sədri Heydər Orucovun cinayət işi məhkəmə prosesi başlayıb.

Teleqraf.com xəbər verir ki, bu gün Bakı Ağır Cinayətlər Məhkəməsində hakim Əhməd Quliyevin sədrliyi ilə baş tutan prosesdə prokuror ittiham aktını elan edib.

İttihama münasibət bildirən Çingiz Cəlilov özünü təqsirli saymayıb.

Hazırda proses davam edir.

***

15:19

Prosesdə təqsirləndirilən şəxsin vəkili Janna Bağırovanın suallarını zərərçəkmişin nümayəndəsi cavablandırıb.

Zərərçəkmişin nümayəndəsi suallara cavabda xatırladıb ki, Çingiz Cəlilov istintaqa 13 milyon 962 min manat pul vəsaitini məsimsədiyini etiraf edib.

Daha sonra şahid qismində Çingiz Cəlilovun qardaşı Pərviz Cəlilov ifadə verib. O, 2001-ci ildən “Çudo Peçka” şirkətində baş direktor vəzifəsində işlədiyini söyləyib: “İlk mağazanı da həmin il açdıq. Orta hesabla ildə 2-3 mağaza açırdıq. “Bank Standard”dan 2006-cı ildən kredit götürməyə başladıq. Biz hər ay banka 600 min manat pul qaytarırdıq. 2011-ci ildə bankın sabiq sədri Səlim Kriman bizə təklif etdi ki, gəlin birgə işləyək. Biz əvvəl razı olmadıq. Məcbur olduq, onlar deyən şərtlərlə razılaşaq. Çünkü banka borcumuz var idi. Axırda bizi şirkətə yaxın buraxmadılar. Məhkəməyə müraciət etdik. 2016-cı ildə isə Binəqədi Rayon Məhkəməsinin qərarı ilə şirkət bizə qaytarıldı”.

Şahid aldadıldıqlarını deyib: “2009-cu ildə köhnə borcları bağladıq, sonra yenidən kredit götürdük. Bundan sonra banka borcumuz yarandı. Biz onların dedikləri ilə hərəkət edirdik. Bankın sabiq rəhbəri Səlim Krimanla birbaşa mən əlaqə saxlayırdım”.

***

Daha sonra müdafiəçilərin suallarına cavab verən Pərviz Cəlilov bildirib ki, “Bank Standard”a ümumilikdə 15 milyon manat kredit ödəyiblər.

Şahid qeyd edib ki, Səbail rayon Məhkəməsindən banka 23 milyon manatlıq borcla bağlı bildiriş gəlib: "Bu barədə Səlim Krimanla əlaqə saxladım ki, biz belə danışmadıq, niyə belə oldu? Səlim Kriman da mənə “bu, rəhbərliyin göstərişidir”, deyə cavab verdi. Bildiyim qədəri ilə bankın rəhbəri Heydər Babayev idi. Səlim Kriman da Heydər Babayevi və onun həyat yoldaşını nəzərdə tuturdu. Axı, mən Heydər Babayevi deyil, Səlim Krimanı tanıyırdım”.

Pərviz Cəlilov qeyd edib ki, 2010-cu ildə ləğv edilmiş Milli Təhlükəsizlik Nazirliyinin əməkdaşları şirkətə gəlib və onu həbs edib. Amma “MTN işi”ndə zərərçəkmiş kimi tanınmayıb: “MTN-də məndən 2 milyon manat pul istədilər. Mən də 1 milyon 200 min manata razılaşdım. Çünkü oradan canımı qurtarmaq istəyirdim”.

Pərviz Cəlilovun sözlərinə görə, “Bank Standard”dan ümumilikdə 18 milyon manat kredit götürüblər, həmin pullardan isə 15 milyon manatı ödəyiblər.

Növbəti proses yanvarın 25-də davam edəcək.

İttihama görə, müxtəlif hüquqi və fiziki şəxslərin adına bankdan kredit kimi aldığı külli miqdarda vəsaiti bankın vəzifəli şəxsi ilə birgə təyinatından yayındıraraq şəxsi ehtiyacları üçün mənimsəyən şirkət rəhbərinin qanunsuz əməlləri barədə Baş prokuror yanında Korrupsiyaya qarşı Mübarizə Baş İdarəsində araşdırma aparılıb.

Müəyyən edilib ki, Çudo Peçka və ÇP Aqro MMC-lərin təsisçisi Çingiz Cəlilov Bank Standard QSC Kommersiya Bankının İdarə Heyətinin sədri olmuş Kriman Səlim Eldaroviçlə qabaqcadan razılaşmaqla əlbir olaraq 21 milyon 874 min manat məbləğində krediti bankın Müşahidə Şurasının razılığı olmadan yaxın qohumları və qohumluq münasibətində olduğu, eləcə də rəhbərlik etdiyi cəmiyyətlərdə işləyən ayrı-ayrı şəxslərin adlarına guya bağ evinin alınması, mənzil təmiri, torpaq alınması və bu kimi digər təyinatlarla rəsmiləşdirilməsinə nail olub.

Daha sonra qeyd olunan kredit müqavilələri əsasında banka guya külli miqdarda kredit borcu olduğu görüntüsü yaradaraq bir neçə dəfə restrukturizasiya (kreditin və ya onun ödənilməsi şərtlərinin dəyişdirilməsi) etdirməklə mənimsədiyi 13 milyon 962 min manat pul vəsaitini Səlim Krimanla öz aralarında bölüb.

Çingiz Cəlilovun qeyd edilən kredit məbləğlərini bankın vəzifəli şəxsləri ilə əlbir olaraq şəxsi ehtiyaclarına xərcləməsinə şübhələr üçün əsaslar yarandığından ona Cinayət Məcəlləsinin 179.3.2 (külli miqdarda mənimsəmə və ya israf etmə, yəni təqsirkara etibar edilmiş özgə əmlakını talama) və 308.2-ci (vəzifə səlahiyyətlərindən sui-istifadə ağır nəticələrə səbəb olduqda) maddələri ilə ittiham elan olunub.

İstintaq dövründə aparılan araşdırmalardan sonra "Bank Standart"ın İdarə Heyətinin keçmiş sədri Heydər Orucov da həbs edilib.