Prokuror baş redaktora şərti cəza istədi

Gəncə hadisələrindən sonra barəsində cinayət işi başlanan Criminalaz.com saytının baş redaktoru Anar Məmmədovun cinayət işi üzrə məhkəmə prosesi keçirilib.

Teleqraf.com-un xəbərinə görə, bu gün Bakı Ağır Cinayətlər Məhkəməsində hakim Eldar Mikayılovun sədrliyi ilə baş tutan prosesdə prokuror ittiham nitqi ilə çıxış edib.

O, Anar Məmmədovun əməlinin sübuta yetirildiyini deyib. Sonda baş redaktorun barəsində Cinayət Məcəlləsinin 70-ci (şərti məhkum etmə) maddəsinin tətbiq edilməsini, ona 2 il sınaq olmaqla 5 il 6 ay müddətinə şərti cəza verilməsini istəyib.

Növbəti proses martın 15-də davam edəcək.

Anar Məmmədov Cinayət Məcəlləsinin 281.2-ci (dövlət əleyhinə yönələn açıq çağırışlar), 309.2-ci (vəzifə səlahiyyətlərini aşma) və 313-cü (vəzifə saxtakarlığı) maddələri ilə ittiham olunur.

Anar Məmmədovun barəsində ötən il Gəncə şəhər İcra Hakimiyyətinin başçısı olmuş Elmar Vəliyevə, polis zabitlərinə qarşı edilən terror aktından sonra cinayət işi açılıb.

Anar Məmmədovun barəsində başqa yerə getməmək barədə qətimkan tədbiri seçilib.