Bakıda dostunu öldürən naxçıvanlıya ağır – Cəza

Bakının Səbail rayonunda dostunu küçədə qətlə yetirən Əli Nağıyev barəsində olan cinayət işi üzrə məhkəmə prosesi başa çatıb.

Teleqraf.com xəbər verir ki, bu gün Bakı Ağır Cinayətlər Məhkəməsində hakim Əlövsət Abbasovun sədrliyi ilə baş tutan prosesdə təqsirləndirilən şəxsə hökm oxunub.

Əli Nağıyev 13 il müddətinə azadlıqdan məhrum edilib.

İttihama görə, 8 fevral 2017-ci il tarixində Səbail rayonunun Bayıl qəsəbəsində Naxçıvan sakini, 1985-ci ildə Əli Nağıyev dostu Nail Abdurəhmanovu bıçaqlayaraq qətlə yetirib. Daha sonra ölkə hüdudlarını keçərək, Gürcüstan respublikasına gedib.

Azərbaycan hüquq-mühafizə orqanları onun barəsində axtarış verib. Bu ilin iyununda Əli Nağıyev həbs edilib, iyunun 27-də Gürcüstandan Bakıya ekstradisiya olunub.

İstintaqın gəldiyi nəticəyə görə, Əli Nağıyev dostu ilə dalaşaraq onu bıçaqlayıb. Bıçaqlanan şəxs hadisə yerindəcə ölüb. Əli Nağıyev dostunu küçədə qan içində qoyaraq qaçıb və hüquq-mühafizə orqanlarının əlinə keçməmək üçün qonşu ölkədə özünə sığınacaq tapıb.

Əli Nağıyev barəsində Cinayət Məcəlləsinin 120.1-ci (qəsdən adam öldürmə) maddəsi ilə ittiham elan edilib.