Polis 4 rayonda əməliyyat keçirdi: Həbs olunanlar var

Qusar rayonunda narkotiklərlə bağlı əməliyyat keçirilib.

Teleqraf.com xəbər verir ki, Qusar rayon polis şöbəsi əməkdaşlarının daxil olmuş məlumat əsasında keçirdikləri əməliyyat-axtarış tədbirləri nəticəsində Yasab kənd sakini N.Məmmədovun kəndin ərazisində kultivasiya yolu ilə yetişdirdiyi 52 ədəd çətənə kolu aşkar edilərək götürülüb.

Bundan başqa, narkotik vasitə ilə tutulmuş X.Novruzovun ətrafında Balakən rayon polis şöbəsində araşdırma aparılıb.

Polis əməkdaşları tərəfindən aparılmış tədbirlərlə onun Mahamalar kəndindəki evindən 1 kiloqramdan artıq marixuana aşkar edilib.

Qəbələ rayon polis şöbəsi əməkdaşlarının daxil olmuş məlumat əsasında keçirdikləri əməliyyat-axtarış tədbirləri nəticəsində Aydınqışlaq kənd sakini E.Yahyayevdən müvafiq sənədləri olmayan, nömrəsi silinmiş “BUM” markalı ov tüfəngi aşkar edilərək götürülüb.

Narkotiklərlə bağlı daha bir əməliyyat paytaxtın Suraxanı rayonunda keçirilib.

Suraxanı rayon Polis İdarəsi əməkdaşlarının daxil olmuş məlumat əsasında keçirdikləri əməliyyat-axtarış tədbirləri nəticəsində Yeni Suraxanı qəsəbə sakini M.Balaqədirovun evindən 87 ədəd çətənə bitkisi və 1,5 kiloqram marixuana aşkar edilib.