Azərbaycansayağı “Xaç atası” üzə çıxır

Sabah "Park Bulvar"da Elmar Bayramovun rejissoru olduğu "Don Marleone" filminin treylerinin təqdimatı olacaq.

Teleqraf.com xəbər verir ki, filmin çəkilişi Azərbaycanın müxtəlif məkanlarında, eləcə də xaricdə - İtaliyada aparılıb.

Triller janrında çəkilən "Don Marleone" naməlum şəxslər tərəfindən qətlə yetirilmiş atasının cinayətini araşdıran gəncin qarşılaşdığı hadisələrdən bəhs edir. Bu film məhşur “Xaç atası” filminə parodiya olduğu üçün komediya elementləri ilə də zəngindir.

Filmdə baş rolda tanınmış model, “Best Model of the World 2007” yarışmasının qalibi Rüstəm Cəbrayılov çəkilib.

Ssenari müəllifi Rəşad Süleymanoğludur. Ekran əsərində Natəvan Əfəndiyeva, Sain Fərhad, Murad Abdullayev, Əlibəy Məmmədli, Nofəl Şahlaroğlu, Ayşad Məmmədov, Azər Aydəmir, Bəhram Bağırzadə və başqaları rol alıb.

Filmin quruluşçu rejissoru Elmar Bayramov Kapoeyra federasiyasının vitse-prezidentidir. Peşəkar idmançı olan Elmar Bayramov filmin döyüş səhnələrində çəkilib.

Filmin qala gecəsi aprel ayının 20-də baş tutacaq.

Nərmin