Emin Ağalarov Trampı Bakıya dəvət etdi

“Jara” Beynəlxalq Musiqi Festivalının təşkilatçısı, bəstəkar-müğənni Emin Ağalarov Rusiyanın “Komsomolskaya pravda” nəşrinə festivalın yekunları barədə danışıb.

Teleqraf.com həmin müsahibəni təqdim edir:

- Bu il siz Moskvada bir araya gələ bilməyəcək insanların bir səhnəni bölüşməsinə nail oldunuz - Alla, Sofiya, Vaxtanq Kikabizde...

- Mən çox istərdim ki, festivalda heç bir sərhəd olmasın. Bura bütün post-sovet məkanının şou-biznes ulduzları qatılıb. Azərbaycan neytral və müstəqil dövlətdir. 70-ci illərdə burada caz festivalları keçirilib. Bu ölkədə musiqi hadisələri təşkil etmək ənənəsini niyə davam etdirməyək? “Jara” - modalı və gənc, eyni zamanda tarixi ənənələrə əsaslanır.

- Mən bilirəm ki, siz uğurlu iş adamısız. Mənə elə gəlir ki, siz bu festivalın büdcəsinə baxmadan işə baş qoşa bilməzdiz. Necə düşünürsüz, festivala qoyulan xərc nə vaxt özünü doğruldacaq?

- Mən qarşıma belə bir vəzifə qoymuram. Prodakşnlara, artistlərin yerləşdirilməsinə, yeməyə xərclədiyim pullara görə təəssüf etmirəm. Sanki insanları öz evində Yeni il şənliyinə dəvət edirsən. Festival mənə məxsus özəl ərazidə - mənim otel kompleksi tikmək istədiyim “Sea Breeze”də keçirildiyindən festival, həmçinin dolayısı yolla mənim ərazim üçün reklam platformasıdır. Üstəgəl biz “Jara” telekanalının da yayımına başlamışıq.

- Bu ilki festivalın xüsusi qonağı Till Lindemann oldu. Onu sizinlə Stiven Siqal tanış edib. Növbəti illərdə səhnədə əcnəbi ulduzları görə bilərik?

- Hesab edirəm ki, burada bir az geniş düşünmək lazımdır. Mənim planlarıma "beynəlxal gün" təsis etmək daxildir. BBC ilə danışıqlar aparıram. Onlarla birlikdə dünya ulduzları ilə razılaşmaq fikrindəyəm. Biz istəyirik ki, səhnədə bir deyil, bir neçə dünya ulduzu çıxış etsin. Əgər planlarımız baş tutsa, “Jara” beynəlxalq səviyyədə festival olacaq.

- Mən oxumuşam ki, sizin ailənizin ABŞ Prezidenti Donald Trampla dostluq münasibətləri var. Növbəti illərdəki festivallardan birində onu görə bilərik?

- Mən Donald Tramp, Robert de Niro, Cennifer Lopes də daxil olmaqla, bütün dostlarımı və yaxşı insanları dəvət etməyi planlaşdırıram və onları öz festivalımda gözləyirəm.