20 May 2015 10:04
774
12 Punto 14 Punto 16 Punto 18 Punto

Birinci Avropa Oyunlarının məşəlinin növbəti ünvanı dağlar diyarı Gədəbəy oldu.

Trend xəbər verir ki, mayın 19-da rayonda əsl bayram əhval-ruhiyyəsi yaşanıb. Heydər Əliyev parkının qarşısında minlərlə gədəbəyli toplaşıb. Birinci Avropa Oyunlarının rəmzi qapısında məşəli rayon idmançısı Nurlan Məmmədov qəbul etdikdən sonra 10 idmançı 4 kilometr məsafədə yürüş edib. Heydər Əliyev prospekti, Akademik Zərifə Əliyeva və 20 Yanvar küçələrindən keçərək Heydər Əliyev parkına gələn məşəlçilər alqışlarla qarşılanıb. Sonuncu yürüşçü, şahmat üzrə məşqçi Murğuz Süleymanov səhnəyə qalxaraq, məşəli alovlandırıb. Avropa Oyunlarının çırağını 1 saylı şəhər orta məktəbinin XI sinif şagirdi Fidan Əsədullayeva ictimaiyyətə təqdim edib. Sonra çıraq ilk Avropa Oyunları başa çatanadək saxlanılması üçün mərkəzi mədəniyyət evinə təhvil verilib.

Mərasimdə aprelin 26-da Atəşgah məbədində Birinci Avropa Oyunlarının məşəlinin alovlandırılması mərasimini əks etdirən videoçarx nümayiş olunub.

Məşəl estafetini izləyən rayon sakinlərindən biri, Arıxdam kənd orta məktəbinin müəllimi Tünzalə Məmmədova AZƏRTAC-ın müxbiri ilə söhbətində deyib: “İlk Avropa Oyunlarının Azərbaycanda keçirilməsi ölkəmizin beynəlxalq aləmdə böyük nüfuzunun olmasından xəbər verir. Cəmi 24 illik müstəqilliyi olan bir dövlətdə belə bir möhtəşəm tədbirin keçirilməsi onu deməyə əsas verir ki, Azərbaycan uğurlu yoldadır və onun işıqlı gələcəyi var. Bu gələcəyin təməli isə müstəqil Azərbaycanın memarı və qurucusu olan ulu öndər Heydər Əliyevin uzaqgörən siyasəti ilə qoyulub. Azərbaycan Prezidenti İlham Əliyev bu siyasəti uğurla davam etdirərək, ölkəmizi yeni-yeni uğurlara qovuşdurur”.

Məşəl yürüşü mərasiminin sevincini yaşayan Gədəbəy şəhər 2 nömrəli tam orta məktəbinin direktoru Qabil Allahverdiyev sevincini belə ifadə edib: “Bu gün gədəbəylilər özlərinin ən sevincli günlərini yaşayırlar. Belə mötəbər bir tədbirin Azərbaycanda keçirilməsi ancaq xəyal ola bilərdi. Bu xəyalı Prezident İlham Əliyev gerçəkləşdirdi. Bütün Avropa ölkələrinin idmançıları, eləcə də idmansevərləri iyunun 12-də Azərbaycana gəlməklə həm Oyunları izləyəcək, həm də ölkəmizin gözəllikləri, maddi-mədəni abidələri ilə yaxından tanış olacaqlar”.

Birinci Avropa Oyunlarının Azərbaycanda keçirilməsindən qürur duyan rayon təhsil şöbəsinin müdiri Baxış Nağıyev isə deyib: “Avropa Oyunları Azərbaycan dövlətinin qüdrətini bir daha dünyaya bəyan etdi. Belə bir möhtəşəm tədbirin keçirilməsi onu deməyə əsas verir ki, yaxın zamanlarda Azərbaycan dünyanın ən qabaqcıl ölkələrindən biri olacaq. Dövlətimizin başçısının bu istiqamətdəki yorulmaz fəaliyyəti göz qabağındadır. İnanıram ki, idmançılarımız da bizi qələbələri ilə sevindirəcəklər”.

Sonda incəsənət ustaları konsert proqramı ilə çıxış ediblər.


Müəllif: