Zelenskinin açıqlaması Kremli qəzəbləndirdi: “Bu, Rusiya üçün təhlükədir”

Kremlin sözçüsü Dmitri Peskov Ukrayna-Rusiya gərginliyi ilə bağlı açıqlama verib.

Teleqraf.com xəbər verir ki, Peskov Ukrayna Prezidenti Vladimir Zelenskinin Krımla bağlı son açıqlamalarına münasibət bildirib.

“Zelenski parlamentdəki çıxışında bildirib ki, Krımın qaytarılması Ukraynanın əsas məqsədi və fəlsəfəsi olmalıdır. Biz bunu Rusiya üçün birbaşa təhdid kimi görürük. Bu bəyanatlar o deməkdir ki, Kiyev Rusiyanın bir hissəsinə təcavüz etmək üçün bütün mümkün vasitələrdən, o cümlədən gücdən istifadə etmək niyyətindədir”, - Kremlin sözçüsü söyləyib.

Kiyevin Donbas problemini də hərbi yolla həll etmək cəhdlərini istisna etmədiyini qeyd edən Peskov bunun Moskvada narahatlıqla qarşılandığını deyib:

“Ukrayna hökumətinin çox aqressiv ritorika işlətdiyini və Donbasda təxribat xarakterli davranışlarını artdığını görürük. Bu o deməkdir ki, Ukrayna administrasiyası Donbas məsələsini hərbi yolla həll ssenarisini, yəni birtərəfli qaydada müstəqillik elan etmiş respublikalara qarşı hərbi addımları istisna etmir”.

Zelenski dünən parlamentdə verdiyi açıqlamada Krımı geri almağı planlaşdırdıqlarını bildirib və Rusiya ilə birbaşa danışıqlar olmadan müharibəni dayandıra bilməyəcəklərini bildirib.

Donbas üçün isə Zelenski bunu deyib: “Donbası qaytarmaq istəyiriksə, bir-birimizlə həqiqəti danışmaqdan qorxmamalıyıq”.