Məğlubiyyət Rusiyada fəlakət hissi yaradır - Məqalə

“Məğlubiyyət istər-istəməz Rusiyada fəlakət hissi yaradır və bu hiss, duyğu getdikcə insanlar arasında yayılır".

Teleqraf.com xəbər verir ki, bu barədə “The New York Times” nəşri Luqansk vilayətinin Beloqorovka ərazisi yaxınlığından Donetsk çayını keçməyə cəhd edən rus ordusunun məğlubiyyəti ilə bağlı analitik məqalə dərc edib.

Məqalədə deyilir ki, hətta rusiyayönümlü hərbi blogerlər də işğalçı ordunun hərəkətlərindən məyus olub, Rusiya ordusunun rəhbərliyini tənqid edirlər.

Jurnalistlərin məlumatına görə, Beloqorovka yaxınlığında 485 rusiyalı həlak olub və ya yaralanıb, 80-dən çox texnika məhv edilib.

Qeyd olunur ki, əgər itkilər həqiqətən də bu qədər böyükdürsə, o zaman bu məğlubiyyəti Ukraynanın “Neptun” raketləri ilə vurulmuş “Moskva” kreyserinin məhv edilməsi ilə müqayisə etmək olar.

Mayın 10-da Luqansk Vilayət Dövlət Administrasiyasının rəhbəri S. Haydai bildirib ki, Beloqorovka yaxınlığında Severski Donetsk üzərində işğalçıların tikdiyi ponton keçidləri dağıdılıb, kənd rus qoşunlarından təmizlənir. Səhərisi gün Silahlı Qüvvələr düşmənin ponton körpülərini də darmadağın edib.

Mayın 12-də Severski Donetsk çayı yaxınlığında çox sayda məhv edilmiş texnikanı əks etdirən fotolar ortaya çıxıb.