Qonşu ölkədə təşvişlə izlədilər - “Türkiyə zarafat etmir”

Türkiyənin yeni “Bozdoğan” raketini sınaqdan keçirməsi Yunanıstanda təşvişlə izlənilib.

Teleqraf.com xəbər verir ki, yunan telekanalı “Mega Live News” Prezident Rəcəb Tayyib Ərdoğanın bununla bağlı verdiyi sözün yerinə yetirildiyini, “Bozdoğan”ın sınaq videosunu yaydıqlarını bildirib.

Telekanalın aparıcısı Türkiyənin az qala hər gün yeni silahlarını sınaqdan keçirdiyini deyib:

“Hər gün yeni silahı sınaqdan keçirirlər. Dünən səhər saatlarında Türkiyəyə məxsus PUA Kandelusa adası üzərində növbəti uçuşunu həyata keçirib. Təbliğatda da irəli gediblər. Burada “Bozdoğan” raketinin sınağının görüntülərini görürük. “Bozdoğan”ı F-16-dan atırlar. Bu, digər təyyarələri vurmaq məqsədi daşıyan kiçikmənzilli raketdir. Çoxları bunun Amerikanın geniş istifadə etdiyi “Sidewinder” raketinin kopyası olduğunu deyir.

Bunu deməliyik ki, iki həftə əvvəl “Tayfun” raketinin sınağından sonra türklər Ərdoğanın söz verdiyi kimi bu videonu yaydılar. Beləliklə, təyyarələrdən atılan və digər uçan vasitələri hədəfə alan yeni raketi sınaqdan keçirdilər. Türklərə görə, onun sürəti səs sürətindən 4 dəfə çoxdur. Hər şeydən əvvəl türk istehsalıdır”.

Aparıcı yeni raketin nəyə qadir olduğunun Yunanıstana məlum olmadığını da deyib:

“Hələ bunun dəqiq diapazonunu bilmirik, amma düşünürəm ki, “Sidewinder”dən bir qədər kiçik olmalıdır. Yaxın məsafədən təyyarələri hədəfə alır. Türklər silah sınaqlarını davam etdirirlər. Türkiyənin silah sənayesi çox inkişaf edib. Bəlkə də raketlərlə bağlı hansısa səhvlər olur, amma türklər öz addımlarını atıblar. Bunu araşdırmalı və diqqətdə saxlamalıyıq. Onların istehsal etdikləri zarafat deyil. Problemlərə baxmayaraq, öz dronlarını istehsal edirlər, müasir silah sənayesi qurublar”.