Fransalı generaldan etiraf – “Türkiyə güclənir, əsas hədəfi...”

Fransa ordusunun keçmiş baş qərargah rəisi general Pyer de Viller ölkəsi və Avropadakı geosiyasi vəziyyətlə bağlı diqqətçəkən etiraflar edib.

Teleqraf.com xəbər verir ki, general Fransa ordusunun dünyada və Avropada qabaqcıl hərbi güclər arasında olduğunu, amma ölkəsinin yüksək intensivlikli müharibə ilə üzləşəcəyi təqdirdə uzun müddət tab gətirməsinin çətin olacağını deyib.

Ukrayna-Rusiya müharibəsinə toxunan Viller ölkəsinin ABŞ-ın baxışları ilə üst-üstə düşməsinə etiraz edib:

“Ukraynadakı müharibə nə Avropanın, nə də Fransanın müharibəsidir. Bəlkə heç amerikalıların da maraqlarına uyğun deyil”.

Türkiyə, Rusiya və Çinin güclərini artırdığını söyləyən general bu üç ölkənin hərbi üstünlərinə diqqət çəkib. Viller iddia edib ki, üç ölkə keçmiş imperiya dövrlərində itirdikləri nüfuzlarını bərpa etməyə çalışır.

Ukrayna böhranının Avropanın məğlubiyyətinə səbəb olduğunu deyən Viller qitənin mövcud proseslər fonunda qlobal məsələlərə diqqət yetirə bilmədiyini vurğulayıb.