Roma Papası Lissabona getdi

Roma Papası Fransisk Ümumdünya gənclər günü münasibətilə təşkil olunan festivalda iştirak etmək üçün Lissabona yola düşüb.

Teleqraf.com xəbər verir ki, 86 yaşlı pontifikin sayca 42-ci xarici apostol səfəri dörd gün sürəcək.

Roma Papasının səfəri Portuqaliya rəhbərliyinə və vətəndaş cəmiyyəti nümayəndələrinə müraciətlə başlayacaq. İlk gün Fransisk rəsmi görüşlər keçirəcək, həmçinin yerli ruhanilərin nümayəndələri ilə ünsiyyətdə olacaq.

Sabah isə pontifik gənclərlə görüşəcək və festivalın rəsmi açılışını edəcək. Səfər çərçivəsində o, Müqəddəs Məryəmin Fatimə şəhərindəki ziyarətgahına da gedəcək və orada xəstələrlə birlikdə dua edəcək.

Səfərlə bağlı rəsmi qeydiyyatdan keçən ziyarətçilərin sayı 330 min olsa da, Portuqaliyanın paytaxtına 1 milyona yaxın insanın gələcəyi gözlənilir.