Hücum ara vermir – Rus ordusunun mövqeləri darmadağın edildi

Ötən sutka ərzində cəbhədə Rusiya və Ukrayna qüvvələri arasında 55 toqquşma qeydə alınıb.

Teleqraf.com xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.

Rusiya Ukraynanın mövqelərinə və yaşayış məntəqələrinə 13 raket və 127 hava zərbəsi endirib, 181 dəfə reaktiv sistemlə atəş açıb. Dinc əhali arasında ölən və yaralananlar var, şəxsi yaşayış evləri və çoxmənzilli binalar, digər mülki və sənaye infrastrukturu dağıdılıb və zədələnib.

Rusiya ordusu gecə saatlarında Ukrayna ərazisinə 96 ədəd hücum PUA-sı buraxıb, bunlardan 66-sı məhv edilib. Dronlardan 26-sı “Şahid” tipli (İran istehsalı) olub, bunlardan da 21-i zərərsizləşdirilib.

Rusiya qoşunlarının Kupyan, Zaporoje, Marin, Şaxtyor, Liman və Baxmut istiqamətlərindəki hücumları dəf edilib.

Rusiya Avdiv şəhərini mühasirəyə almağa cəhdlərini dayandırmır, Ukrayna ordusu müdafiəni güclü saxlayır. Rusların şəhərə son həmlələrinin qarşısı alınıb.

Ukrayna qüvvələri bütün cəbhə boyu müdafiə əməliyyatları aparır. Son sutka ərzində Rusiyanın şəxsi heyətinin, silah-sursat və hərbi texnikalarının cəmləşdiyi 9 mövqeyi, 3 sursat anbarı və idarəetmə məntəqəsi məhv edilib.