Rusiyanın cəbbəxanası boşalır – Putin buna görə o ölkəyə gedir

Rusiya xaricdən artilleriya mərmiləri almaq səyləri çərçivəsində Şimali Koreya ilə əməkdaşlığı intensivləşdirir, çünki sursat çatışmazlığı ilə üzləşib.

Teleqraf.com xəbər verir ki, bu barədə ABŞ-nin Müharibə Araşdırmaları İnstitutu (ISW) məlumat yayıb.

Şimali Koreya Xarici İşlər Nazirliyi yanvarın 20-də açıqlamışdı ki, Rusiya Prezidenti Vladimir Putin Moskvada bu qurumun rəhbəri ilə görüşü zamanı yaxın gələcəkdə Pxenyana səfər etməyə hazır olduğunu deyib.

Rusiya lideri sonuncu dəfə 2000-ci ildə Şimali Koreyaya rəsmi səfər edib. ISW-yə görə, ikitərəfli münasibətlərin dərinləşməsinə maraq yeni sursatların alınması ilə bağlıdır.

Ukrayna Müdafiə Nazirliyinin Baş Kəşfiyyat İdarəsi rəisinin müavini Vadim Skibitskinin sözlərinə görə, ötən ilin sentyabr-noyabr aylarında Şimali Koreya Rusiyaya 1 milyon artilleriya mərmisi verib. Belə bir iddianı Cənubi Koreya kəşfiyyatı da irəli sürüb.

“Hesablamalara görə, söhbət Rusiyaya çatdırılan 1 milyon artilleriya sursatından gedir. Bu, Moskvanın öz istehsalı ilə ört-basdır edə bilmədiyi çatışmazlıqdır”, - məlumatda deyilir.

Rusiya hakimiyyəti Şimali Koreyadan sursat aldığını inkar edir.