Əli Əhmədov Şanxay Əməkdaşlıq Təşkilatının Beynəlxalq Partiyalararası Forumunda iştirak etdi

Oktyabrın 23-də Şanxay Əməkdaşlıq Təşkilatının “İnsanlar üçün iqtisadiyyat” mövzusunda videokonfrans formatında Beynəlxalq Partiyalararası Forumu keçirilib.

Teleqraf.com xəbər verir ki, forumu giriş sözü ilə açan Rusiya Federasiyası Dövlət Dumasının Sağlamlıq qorunması üzrə komitəsinin sədri Dmitri Morozov mövzunun aktuallığından danışıb. O, bu məsələdə Şanxay Əməkdaşlıq Təşkilatının rolunu vurğulayıb, o cümlədən siyasi partiyaların verə biləcəyi töhfələrdən bəhs edib.

Daha sonra Rusiya Federasiyasının Səhiyyə naziri Mixail Muraşko, Qazaxıstan Respublikasının Səhiyyə naziri Aleksey Çoy, Çin Xalq Respublikasının Səhiyyə nazirinin müavini Yu Syejun çıxış edərək COVİD-19 infeksiyasının ölkələrin sosial-iqtisadi həyatına təsiri və pandemiya ilə mübarizə tədbirləri haqqında fikirlərini bildiriblər.

Forumda Azərbaycan Respublikası Baş nazirinin müavini, YAP Sədrinin müavini-İcra katibi Əli Əhmədov “COVİD-19 pandemiyasının sosial-iqtisadi nəticələrinə və təhlükəli yoluxucu xəstəliklərin yayılmasına qarşı mübarizədə məsul siyasi partiyaların rolu” mövzusunda çıxış edib. Əli Əhmədov bu tədbirə dəvət üçün "Vahid Rusiya" Partiyasının rəhbərliyinə təşəkkür edib. O deyib ki, bu tədbirin Yeni Azərbaycan Partiyasının kifayət qədər aktiv tərəfdaşlıq münasibətləri qurduğu “Vahid Rusiya” Partiyasının vasitəçiliyi ilə keçirilməsi ona xüsusi əhəmiyyət və aktuallıq verir. Əli Əhmədov həmçinin, Azərbaycanın ŞƏT-in işində müşahidəçi qismində iştirak etdiyini diqqətə çatdırıb.

COVİD-19 pandemiyasının Azərbaycandan da yan keçmədiyi deyən Əli Əhmədov bildirib ki, təhlükəli xəstəliyin qarşısının alınması ilə əlaqədar ölkə rəhbərliyi vaxtında qabaqlayıcı tədbirlər həyata keçirdi: “Pandemiya başlayandan strategiyamız Ümumdünya Səhiyyə Təşkilatının bütün təlimatlarını məsuliyyətlə və səmərəli şəkildə həyata keçirmək və dünyada həm keçmişdə, həm də indiki dövrdə pandemiya ilə mübarizədə qazandığımız müsbət təcrübədən istifadə etmək idi. Təcrübə Azərbaycanda koronavirus pandemiyasına qarşı bu yanaşmanın müdrikliyini sübut etdi və sübut etməyə də davam edir. Vaxtında görülən sanitariya və epidemioloji tədbirlər koronavirusun yayılma sürətini xeyli azaltdı. Xarici sərhədlərin bağlanması ilə Azərbaycan bölgəmizdə ilk olaraq vətəndaşların hərəkətinə məhdudiyyət tətbiq etdi. Pandemiyaya qarşı mübarizə məqsədilə cəmiyyətin və dövlətin resurslarının səfərbər edilməsi kifayət qədər uğurlu hesab edilə bilər. Bütün yoluxmuş insanlar üçün əlverişli bir müalicə təmin etmək üçün çox iş başlatdıq. Bu işin aşağıdakı tərkib hissələrini qeyd etmək istərdim. Birincisi, ölkədə əhəmiyyətli bir hissəsi koronavirus xəstələrinin ehtiyaclarına həsr olunmuş müasir bir səhiyyə infrastrukturunun mövcudluğudur. İkincisi, ən qısa müddətdə iki min çarpayılı on modul xəstəxananın yaradılmasıdır. Koronavirus xəstələri ilə təmasda olan həkimlərin və səhiyyə işçilərinin əməkhaqları xeyli artırılıb”.

Əli Əhmədov qeyd edib ki, görülən profilaktik tədbirlər nəticəsində koronavirusla bağlı vəziyyət nəzarətdə saxlanıla bilər. Hal-hazırda Azərbaycanda koronavirus statistikası belədir: epidemiyanın başlanğıcından bəri 43.000 insan bu virusa yoluxub ki, onların da 40.000-i sağalıb. Xəstəlikdən vəfat edənlərin sayı isə 620 nəfərdir. Müqayisəli təhlil Azərbaycanda COVID-19 ilə mübarizənin müəyyən müsbət nəticələr verdiyini deməyə imkan verir. Beləliklə, dünyada bir milyon əhaliyə düşən infeksiya sayı 5 mindən çoxdur və Azərbaycanda bu rəqəm 4 mindən bir az çoxdur. Eləcə də, ölüm sayına gəlincə, dünyada hər milyon insana 132 ölüm düşür, Azərbaycanda isə bu göstərici 62-dir.

“Bütün ölkələrdə olduğu kimi, pandemiya da respublikamızın həyatında dərin sosial-iqtisadi nəticələrlə müşayiət olunur. İqtisadi cəhətdən inkişaf etmiş bir sıra ölkələrdə ÜDM-in on faiz və ya daha çox azalması fonunda bunun ən nikbin ssenarilərdən birini Azərbaycanda olduğunu deyə bilərik. Ancaq bu, koronavirusun iqtisadi və sosial nəticələrinə qarşı mübarizəyə diqqəti zəiflətmək üçün bir səbəb deyil. Bu sahədə Azərbaycan hökumətinin davranış modeli bir çox cəhətdən bir çox ölkənin hökumətlərinin fəaliyyəti ilə üst-üstə düşür. Bu model, birincisi, əhalinin, xüsusən onun yoxsul hissəsinə sosial dəstəyi, ikincisi, kiçik və orta sahibkarlığa geniş dəstək, üçüncüsü, karantin rejiminin tətbiqi nəticəsində qazancından məhrum olan vətəndaşlara əmək haqqının ödənilməsi kimi tədbirləri əhatə edir”-deyə, Əli Əhmədov vurğulayıb.

Çıxışının sonunda YAP Sədrinin müavini sentyabrın 27-dən etibarən Dağlıq Qarabağ münaqişəsi ilə bağlı yaranmış vəziyyət barədə tədbir iştirakçılarına məlumat verib. Ermənistanın Azərbaycan torpaqlarının 20 faizini işğal etdiyini və bunun nəticəsində 1 milyondan çox insanın öz doğma torpaqlarında yaşamaq hüququndan məhrum olduğunu deyən Əli Əhmədovun sözlərinə görə, Ermənistanın işğalçılıq siyasətinə son qoyulmalı və Azərbaycanın beynəlxalq səviyyədə tanınmış ərazi bütövlüyü təmin olunmalıdır.

Forumda həmçinin, digər çıxış edənlər də toplantının mövzusu barədə fikrilərini bildiriblər.