12 Dekabr 2018 22:40
798
12 Punto 14 Punto 16 Punto 18 Punto

Bakıda yaşayış binasından yerə atılan zibil torbası həyətdə dayanmış avtomobilə zərər vurub. Qum və heyvan nəcisi ilə dolu olan torba avtomobilin arxa şüşəsini qırıb.

Hadisə ötən gün axşam saatlarında paytaxtın Nəsimi rayonu, Cavadxan küçəsi 31C ünvanında hündürmərtəbəli binanın həyətində baş verib. Zərərçəkmiş Rövşən Əhmədov deyir ki, axşam saatlarında həmin ünvandakı obyektlərdən birinə gəlib. Təxminən 20 dəqiqə sonra çıxdıqda avtomobilinə zərər dəydiyini görüb.

Xoşbəxtlikdən hadisə baş verən zaman ərazidə heç kim olmayıb. Sürücü hadisə ilə əlaqədar dərhal ''102'' xidmətinə məlumat verib. Əraziyə Nəsimi rayon 19-cu polis şöbəsinin əməkdaşları gələrək baxış keçiriblər. Sığorta ekspertizasının hesablamasına görə, Rövşən Əhmədova təxminən 1500 manat məbləğində ziyan dəyib.

Rövşən Əhmədov deyir ki, avtomobilinin könüllü sığortası var və həmin şirkət dəymiş zərəri qarşılayacaq. Amma həmin vaxt avtomobilin olduğu ərazidən kimsə keçərdisə atılan zibilin ona xəsarət yetirməsi qaçılmaz olardı. Ədəbsizlik edən sakinin tapılması istiqamətində 19-cu polis şöbəsinin əməkdaşları axtarış aparır.


Müəllif: Teleqraf.com