18 yaşlı azərbaycanlının adrenalin sevgisi - FOTO

İlk Avropa oyunlarında Azərbaycanın 11 elçisindən biri olan Elgün Əlizadə 7 ildir ki, velosiped idmanı ilə məşğul olur. Amma onun peşəkar səviyyədə idmana başlaması 2011-ci ilə təsadüf edir.

18 yaşlı Elgün I Avropa Oyunlarında ölkəmizi velosiped idmanının şose növündə təmsil edəcək. Əlizadə Publika.az-a müsahibəsi zamanı qarşıdakı hədəflərindən danışdı.

Tanışlıq: “1996-cı il aprelin 20-də Bakı şəhərində anadan olmuşam. Velosipedə uşaqlıqdan həvəsim olub. Sonra da Əbülfəz müəllimlə (yeniyetmə və gənclərdən ibarət yığma komandaların məşqçisi Əbülfəz Məmmədov - red.) tanış oldum. Bununla da 2011-ci ildən peşəkar idmana gəldim”.

- İdmana elə velosipedlə başlamısan?

- Xeyr, əvvəllər kikboksinqlə məşğul olurdum. Amma bu idmanı tez buraxmalı oldum. Sonra velosipedə başladım. Bu idman növünə yazılmağa tək getmişdim.

- Bu idmana həvəsini ailənə necə çatdırdın? Və necə qarışladılar?

- Öncə razı deyildilər. Daha sonra atamla çox müzakirə etdim, söhbətləşdim, sonra icazə verdilər.

- Maraqlıdır, atanı necə razı saldın?

- Dedim ki, bu idmana çox həvəsim var, çox sevirəm. Məşğul olmaq istəyirəm. Təbii ki, onlar indi tamam başqa fikirdədir. Qarşıda məni gözəl nəticələrin, uğurların gözlədiyinə çox inanırlar.

- Bəs razı salandan sonra ailə üzvlərinizdən məşqlərinə, ya da yarışına gəlib baxanlar oldumu?

- Təkcə atam gəlib. O da yarışa yox, məşqə gəlib.

- Fikirlərinin dəyişməsinə əsas səbəb nə oldu?

- Mənim yarışlardakı çıxışım, özümə inamım və idmana olan həvəsim.

- Kikboksinqi niyə buraxdın? Hər halda, döyüş növləri ölkəmizdə velosiped idmanından daha məşhurdur.

- Çünki kikboksinqə o qədər də həvəsim və marağım yox idi.

- Yaxşı, onda sualı belə verim. Velosipeddə sizi cəlb edən nə oldu? Sürət, adrenalin, ya nə?

- Hər biri - həm sürət, həm də adrenalin. Yenə deyirəm, uşaqlıqdan velosipedim olub. Buna görə də həvəsim böyükdür.

- İlk yarış, ilk nəticən...

- İlk yarışımda Bakı çempionatında velotrekdə səhv etmirəmsə, 17-ci olmuşdum. İlk medalım yadımda deyil.

- Uğurların çox olub?

- Ən diqqət çəkənləri deyim. 2014-cü il Avropa çempionatında iştirak etdim. 12-ci oldum. İtaliyada keçirilən beynəlxalq turnirdə 3-cü yeri tutdum. Slovakiyada keçirilən beynəlxalq turnirdə dağ idmançıları arasında birinciliyi qazandım.

- 18 yaşın var, səncə, ugurlarının sayı az deyilmi? Daha çox ola bilməzdi?

- Ola bilərdi. Sadəcə, bir az öncə də qeyd etdiyim kimi, velosiped idmanı yeni-yeni inkişaf edir.

- Ölkəmizdə velosipedçilərə qiymət verilir?

- Hər bir velosipedçiyə çox yüksək dərəcədə üstünlük verilir.

- Sizin federasiyada da yəqin ki, əcnəbi idmançılar var. Bəs onlarla sizin aranızda fərq qoyulurmu?

- O idmançıya daha çox üstünlük verilir ki, intizamlıdır və nəticələri yaxşıdır. Amma əlbəttə ki, öz idmançılarımıza daha çox üstünlük vermək istəyirlər.

- Yorulduğun və bezdiyin vaxtlar olur?

- Əlbəttə ki, yorulduğum anlar olub. Amma heç vaxt idmandan bezməmişəm.

- Qarşıdakı hədəflərin nədir?

- İndi qarşımdakı əsas hədəfim Bakıda keçiriləcək İlk Avropa Oyunlarında Azərbaycanı layiqli şəkildə təmsil etməkdir. Mənə olan ümidləri doğrultmaq istəyirəm.

- Bu mötəbər yarışda özünü harada görürsən? Verəcəyin nəticə ilə bağlı nə düşünürsən?

- Bu yarışda özümü ilk 20-likdə görürəm.

- Məşqçilərin sənin haqqında nə düşünür? Yəqin ki, fikirlərini bildiriblər.

- Əlbəttə ki, onlar da yaxşı çıxış edəcəyimə inanırlar.

- Ən çox sevdiyin idmançı?

- Fabian Kançellara (“Spartakus” ləqəbli velosipedçi).

- Kimdən nümunə götürürsən? İdealın varmı?

- Daha çox iki idmançı var ki, onlar kimi olmaq istəyirəm. Elə bunlardan biri Fabian Kançellaradır. Digəri də Bredli Viqqinsdir.

- İdmandan başqa hobbin var? Səni ən çox cəlb edən nədir?

- Dəqiq hobbim yoxdur. Amma kompyuter oyunlarını çox sevirəm.

- Kompyuterdə hansı tipli oyunları xoşlayırsan? Daha çox necə oyunlar oynayırsan?

- Məntiqi və avtomobil oyunlarını sevirəm.

- 24 saatı necə planlayırsan?

- Yatmaq vaxtı minimum 8 saat olmalıdır. Məşq isə plan əsasında olur.

- İdmanla bağlı neçə ölkədə olmusan? Bəs heç olubmu yeməkləri bəyənməyəsən və o ölkədən ac qayıdasan?

- Avropanın çox ölkələrində olmuşam. O ki, qaldı ac qayıtmağıma, əlbəttə olub. Bu, demək olar ki, hər bir insanın başına gəlib.

Başına gələn maraqlı hadisə...

“Yarış vaxtı qar yağmışdı. 2014-cü ilin aprel ayı idi. Nəticədə yarışı qısaltdılar. Bununla da 120 km-lik yarış 10 km oldu”.