Rihanna, Tramp, Klinton, Conson... - Dünya bu toydan danışır/Foto

Dünya mediasının gündəmindən düşməyən Anant Ambani və nişanlısı Radhika Merçantın toy hazırlıqları davam edir.

Teleqraf.com xəbər verir ki, hindistanlı milyarder, iş adamı Mukeş Ambaninin 28 yaşlı oğlu Anant Ambani və onun nişanlısı milyarder Viren Merçantin qızı, 29 yaşlı Radhika Merçantın toyu iyulun 12-də olacaq.

Bildirilir ki, cütlük toy hazırlıqlarına mart ayından başlayıb. Həmin ay dünya ulduzu Rihannanın toya hazırlıq şənliyinə qatılması böyük marağa səbəb olmuşdu.

Merçantın toy dəvətnaməsi də dünya mediasının mövzusu olub. Toya çağırılan şəxslərə üzərində tanrı Vişnunun təsviri ilə bəzədilmiş böyük bir qutu göndərilib. Qutuda nimantran patra (dəvətnamə) və qonaq üçün bir neçə hədiyyə yer alıb.

Bundan başqa ötən cümə günü ölkənin mədəniyyət mərkəzlərinin birində cütlük üçün hind qlamur geyimləri ilə möhtəşəm bir "sangeet" mərasimi təşkil edilib.

Mərasimdə pop ulduz Castin Biber ifa edib Bir saatlıq çıxış üçün ona 10 milyon dollar ödənilib.

Bundan əlavə, toya hazırlıq şənliyinə tanınmış yerli müğənnilər Badşah və Karan Aujla, Bollivud aktyorları Salman Xan və Ranveer Sinqhin, eləcə də hind kino industriyasının bir çox tanınmış simaları qatılıblar.

İyulun 12-də keçiriləcək mərasimə isə 1200-ə yaxın şəxs dəvət olunub. Onların arasında Hillari Klinton və Boris Conson da olacaq. Mərasimdə Asiyanın ikinci ən varlı maqnatı Qautam Adaninin də iştirak edəcəyini bildirilir. Toyda qonaqlara yüzlərlə yemək təqdim olunacaq.

Xatırladaq ki, martın 1-də üçgünlük toyqabağı məclisdə iştirak etməsi üçün Rihannaya 10 milyon dollar qonorar ödənilib. Qonaqların siyahısında Bill Qeyts, Mark Zukerberq və həyat yoldaşı Priscilla, Kanadanın keçmiş baş naziri Stiven Harper, Avstraliyanın keçmiş baş naziri Kevin Rudd, "Disney" şirkətinin rəhbəri Bob İqer və İvanka Tramp da olub. Üç günlük mərasimə 153 milyon dollar xərclənib.

Mukeş Ambaninin sərvəti ümumilikdə 111 milyard dollar qiymətləndirilir ki, bu da onun Asiyanın ən varlı və dünyanın isə 11-ci ən varlı adamı olması deməkdir.