Dəfn tonqalında özünə gəldi

Hindistanın Racastan ştatının Bhilvara şəhərinin öldüyü zənn edilən sakini yandırılmaq üçün artıq dəfn tonqalına qoyulduqdan sonra özünə gəlib. Bu barədə Teleqraf.com Daily Mail-ə istinadən məlumat verir.

Belə ki, 72 yaşlı Dipak Sinqh öz evinin həyətində inəklərə yem verərkən qəflətən huşunu itirib. Hadisə yerinə çağırılmış həkim kişinin öldüyünü təsdiqləyib.

D.Sinqh artıq kremasiya mərasiminə bütün hazırlığın görüldüyü və qohumlarının ənənəvi dini nəğmələri oxumağa başladıqları vaxt gözlərini açıb. Nəvəsi Banda Halvanın sözlərinə görə, nəğmələr daha ucadan səslənməyə başlayanda D.Sinqh tərpənməyə başlayıb, daha sonra isə gözlərini açaraq oturub. Qohumları kişinin tonqaldan yerə düşməsinə kömək ediblər.

Az sonra özünə gələn Dipak deyib: “Ümid edirəm ki, onlar məni yenidən yandırmağa cəhd etməzdən əvvəl həqiqətən öldüyüm ana qədər gözləyəcəklər”.

Hindlilərdə cəsədin tonqalda yandırılması ənənəsi, əsasən, Qanq çayının sahillərində yerləşən və hindistanlıların müqəddəs şəhəri sayılan Varanasidə tətbiq edilir.