“Bir də onu narahat etmə…” - Məktəblilərin qız üstündə qanlı davası

Tümen vilayətində orta məktəb şagirdləri arasında ölümcül dava düşüb.

Teleqraf.com Rusiya KİV-ə istinadən xəbər verir ki, oğlanlar arasında baş vermiş dava qız üstündə olub.

Məlumata görə, 14 yaşında olan Roman adlı şagird aşağı sinifdə oxuyan bir qıza vurulub. Günlər keçdikcə Roman sevdiyi qızı rahat buraxmır, rəfiqələrinin yanında olsa belə, onun ətrafından çəkilmir.

Məsələni belə görən qızlar öz sinif yoldaşlarından biri - 11 yaşlı Maksimə vəziyyəti olduğu kimi danışırlar. Maksim əvvəlcə telefonla Romanla danışır və ondan qızları bir də narahat etməməyi istəyir. Maksimin bu sözləri qarşı tərəfi qıcıqlandırır və Roman ona aid olmayan söhbətə müdaxilə etməməyi təkidlə tələb edir.

Telefonda razılığa gələ bilməyən yeniyetmələr söhbəti davam etdirmək məqsədilə Muzey Parkı adlanan yerdə görüşməyi qərarlaşdırırlar.

Roman 20 nəfər dostu ilə artıq görüş yerində idi. Maksim isə özü kimi 5 çəlimsiz sinif yoldaşı ilə gəlmişdi.

Əvvəlcə mübahisə edirlər və birdən sözləri düz gəlməyən məktəblilər əlbəyaxa davaya başlayırlar. Özündən yaşca böyük olan Romanla bacarmayan Maksim büdrəyərək yıxılır. Fürsəti əldən verməyən Roman isə dərhal onun üstünə oturaraq yumruqlamağa başlayır. O, onu qədər vurur ki, Maksim al-qanın içində huşunu itirir.

Vəziyyəti belə görən Roman dostları ilə hadisə yerindən uzaqlaşır.

“Qızların müdafiəçisi” ağır vəziyyətdə xəstəxanaya yerləşdirilir. Müayinələrdən sonra onun vəziyyətinin xüsusilə ağır olduğu üzə çıxır.

Qeyd edək ki, hadisənin hüquq-mühafizə orqanları tərəfindən araşdırılıb-araşdırılmaması haqda məlumat verilmir.