19 İyul 15:28
510

Azərbaycan boks üzrə qadınlardan ibarət milli komandanın üzvü Məryəm Cəbrayılova barəsində cinayət işi başlanılıb.

Teleqraf.com xəbər verir ki, ona Cinayət Məcəlləsinin 221.1-ci (xuliqanlıq, yəni ictimai qaydanı kobud surətdə pozan) maddəsi ilə ittiham elan edilib.

İttihama görə, Məryəm Cəbrayılova Günay Zeynalovaya qarşı xuliqanlıq edib.

Məryəm Cəbrayılovanın barəsində olan cinayət işi üzrə ibtidai istintaq yekunlaşıb və iş baxılması üçün Səbail rayon Məhkəməsinə göndərilib.

Cinayət işi hakim Ağamalı Qafarovun icraatına verilib.

Məhkəmənin hazırlıq iclasının vaxtı hələlik açıqlanmayıb.

Qeyd edək ki, zərərçəkmiş Günay Zeynalova daha əvvəl mətbuata açıqlamasında avtomobillə Xaqani bağı istiqamətində hərəkət edərkən, əks yoldan daxil olan Məryəm Cəbrayılovanın da içərisində olduğu avtomobil onun qarşısını kəsib və yolu bağlayıb.
Günay Zeynalova etirazını bildirdikdə isə avtomobildən düşən Məryəm Cəbrayılova ona hücum edib. Pəncərədən əlini uzadıb, üzünə yumruq vurub.

Hətta, yenicə əməliyyat olsa da, onun yarasının üstünə zərbələr endirib.

Məryəm Cəbrayılova açıqlamasında yaşananların Günay Zeynalova tərəfindən şişirdildiyini və həmin qadına əl qaldırmadığını deyib.


Müəllif: Hacı Zeynalov