“Supermen” haqqında komiks rekord qiymətə satıldı

ABŞ-ın "Heritage" hərrac evində "Supermen" haqqında komikslərin nadir nüsxəsi 956 min dollara satılıb.

Lot onu 1990-cı illərdə 26 min dollara əldə edən amerikalı kolleksioner tərəfindən satışa təqdim olunub. "Certified Guaranty Co." şirkəti bu buraxılışı 10 bal üzərindən 5,5 balla qiymətləndirib. Lotun yeni sahibi naməlum qalmaq qərarı verib.

"Supermen" ilk dəfə olaraq 1938-ci ildə "Action Comics № 1" nəşrinin səhifələrində təqdim olunub. Hekayənin müəllifi Cerri Siqel, illüstratoru isə Co Şuster olub. Bu komiksdə Supermen Yerə gəlir, günahsız qadını elektrik stulundan xilas edir, öz arvadını döyən kişini cəzalandırır və Lois Leyn adlı qızla görüşə gedir. 2014-cü ildə buraxılışın nüsxələrindən biri eBay-də hərracda rekord 3,2 milyon dollara satılmışdı.

/buro247.az/