Erməni münsiflər Əminənin qələbəsini etiraf etdi - Foto

Gürcüstanın Barjomi şəhərində VI “Harmoniya” Beynəlxalq Müsiqi Festivalı keçirilib.

Teleqraf.com-un xəbərinə görə, festivalda Azərbaycan,Türkiyə, ABŞ, Qazaxıstan, Ermənistan və digər ölkələrin nümayəndələri iştirak ediblər. Hər ilin iyul ayında Barjomidə keçirilən festivalda musiqi məktəblərinin şagirdləri iştirak edərək klassik və müasir solo, fortepiano, skiripka və digər alətlər üçün yazılmış əsərləri ustalıqla nümayiş etdiriblər.

Hər il olduğu kimi bu ildə Azərbaycanın müxtəlif musiqi məktəblərinin şagirdləri festivalda aktiv iştirak edərək müxtəlif nominasiyalar üzrə qalib olublar. Belə şagirdlərdən biri də Sumqayıt şəhərində yerləşən Qubadlı rayon Fəxrəddin Hüseynov adına Mahmudlu kənd musiqi məktəbinin üçüncü sinif şagirdi Əminə Yaqut Nəsirlidir. Balaca pianoçu bəstəkarlar Azər Dadaşovun “Məzəli rəqs” və Aleksandr Qrikin “ Yolsterin rəqsi” əsərlərini uğurla ifa edərək Münsiflər Heyətinin qərarı ilə festivalın lauriatı adının qazanıb. Şagirdimiz ən yaxşı ifa və səhnə performansına görə yüksək qiymətləndirilib.

Qeyd edək ki, bu ilki yarışma ötən ilkilərə nisbətən gərgin keçib. Səbəb yarışmada bədxah düşmənlərimizin aktivlik nümayiş etdirməsi və ən əsası, Münsiflər Heyətinin yeddi üzvündən üçünün erməni olması idi. Buna baxmayaraq, Əminə Yaqut istedadını ortaya qoyaraq öz yaş kateqoriyası üzrə uğur qazana bilib. Onun bu qələbəsi ermənilər tərəfindən də etiraf olunub. Festivalın Münsiflər Heyətinin üzvlərindən biri, ABŞ-da yaşayan dünya şöhrətli pianoçu David Aladaşvili səhnəyə qalxaraq azərbaycanlı şagirdi təbrik edib, onun valideynlərinə və müəlliməsinə öz minnətdarlığını bildirib. D. Aladaşvili deyib:” Hər il bu festivalda iştirak edirəm, deyə bilərəm ki, Azərbaycan güclü musiqi ənənələrini qorumaqdadır. Bu, sizdə dövlət tərəfindən mədəniyyətə göstərilən yüksək qayğının nəticəsidir. Azərbaycanlı şagirdlərin ifaları çox xoşuma gəldi, onları gələn il yenə bu yarışmada gözləyirik”.

Şagirdi festivala hazırlaşdıran pedqoq musiqi məktəbinin müəlliməsi İradə Abdullayeva olub. Pedaqoq təəssuratlarını belə açıqlayıb:” Bu yarışmada Azərbaycanımızın, şəhərimizin adının yüksəldilməsi üçün var gücümüzlə çalışdıq. İnanırdım ki, şagirdlərimiz gözəl nəticələr göstərəcəklər. Xüsusən, Əminə Yaqutun ifaları çox ugurlu alındı və Münsiflər Heyətində ermənilərin olmasına baxmayaraq qalib seçildi. Şadam ki, çəkdiyimiz əziyyətlər yerdə qalmadı”.

Qubadlı Rayon Mədəniyyət və Turizm İdarəsi, eləcə də musiqi məktəbinin rəhbərliyi şagirdlərin festivala ciddi hazırlaşmaları üçün lazımi təşkilati dəstəyini əsirgəməyib.

Qeyd edək ki, qaliblər festivalın fəxri diplomları ilə təltif olunublar.