Azərbaycanlı rəqqas Estoniyanı heyran etdi

Estoniya Milli Opera Teatrının konsert zalında “Etoile Ballet Gala” adlı qala-konsert keçirilib. Konsertdə dünya balet ulduzları, planetimizin ən məşhur balet truppalarının nümayəndələri çıxış ediblər.

Teleqraf.com-un məlumatına görə, Azərbaycan Respublikasının Estoniya Respublikasındakı səfirliyinə istinadla xəbər verir ki, qala-konsertin iştirakçıları arasında azərbaycanlı – Rudolf Nureyev adına XVI Beynəlxalq balet festivalının “Balet sənətinin inkişafında töhfəyə və yüksək peşəkar ustalıq səviyyəsinə görə” mükafatı laureatı və Budapeştdə keçirilmiş XVIII Beynəlxalq qala-konsertin xüsusi mükafatının sahibi, istedadlı rəqqas Ülvi Əzizov da olub.

Konsertin proqramına “Paris alovu”, “Yatmış gözəl”, “Sonalar gölü”, “Don Kixot”, “Esmeralda” və digər baletlərdən məşhur partiyalar daxil edilib.

Azərbaycan səfirliyi bu möhtəşəm tədbirin təşkilinə kömək göstərib. Diplomatik korpusun nümayəndələri - gecənin qonaqları artistlərin peşəkarlığını yüksək qiymətləndirib, “Don Kixot” baletindən klassik partiya ilə yanaşı, milli Azərbaycan rəqsini də ifa edən Ülvi Əzizovun ustalığını xüsusi qeyd ediblər.