“Məşəl daşımaq böyük fəxarətdir” - Faiq Ağayev

Xalq artisti Faiq Ağayev “Bakı 2015” Avropa Oyunlarının məşəldarlardan biridir. Teleqraf.com xəbər verir ki, bu barədə jurnalistlərin suallarını cavablandıran müğənni Avropa Oyunlarının ölkəmiz üçün əhəmiyyətinə də toxunub:

- «Olimpiyada» sözü dilə gələndə neçə ki, Yunanıstan xatırlanır, bundan sonra «Avropa Oyunları» deyəndə Azərbaycan, Atəşgahda yanan məşəl dilə gələcək. Avropa Oyunları tarixə Atəşgahla həkk olunacaq. Və bunu tarixə həkk etmək üçün təbii ki, həm də əsərlər yazılmalıdır, ifa olunmalıdır. Bu mənada Avropa Oyunlarına mahnı həsr edən dostlarımı alqışlayıram. Mən Azərbaycan müğənnisinin istənilən keyfiyyətli məhsulunu görəndə sevinirəm. Çünki bu siz tamaşaçılara və biz sənətdə olanlara xeyirdir. Bədnam qonşularımız indi dirsəklərini yox, topuqlarını dişləyə-dişləyə qalıblar. Çünki onların ölkəsinin tarixinə bu şərəfli səhifə - Avropa Oyunları yazılmayıb. Onlar var gücü ilə bizi dünya və Avropa ictimaiyyəti qarşısında gözdən salmaq istəyirlər. Mətbuatdan xahiş edirəm ki, onların dəyirmanına su tökən şəxslərin fikirlərini dərc etməyin.

-Avropa Oyunlarında tamaşaçı kimi iştirak edəcəksiniz?
-İnşallah.

-Dəvətnaməniz var?
-Hələ ki, bu barədə məlumat verə bilmərəm. Amma məşəl daşıyacam, xəbəriniz olsun. Mən də o xoşbəxt azərbaycanlılar siyahısındayam ki, məşəl daşımağı mənə də həvalə və etibar ediblər. Bu mənim üçün böyük hadisədir. Çünki illər keçəcək və çox azsaylı azərbaycanlılar fəxarətlə söyləyə biləcəklər ki, o məşəli mən də daşımışam. Bu mənim üçün böyük fəxarətdir.

-Məşəli ayın neçəsi daşıyacaqsınız?
-İyun ayının 9-u.

-Məsafəniz bəllidirmi?
-Ortamala hamıda eyni məsafədir. Çünki 150 nəfər var. Yəqin ki, deyilən məsafə olacaq. Hələ ki, şükür Allaha, qaçmağı bacarırıq.

-Bəs marşrutunuz hardan başlayır?
- İçərişəhərdən. İstiqamətini orda izah edəcəklər.

-Hansı idman növünə maraq göstərirsiniz?
-Azərbaycanlılar çıxış etdikləri bütün idman növlərinə pərəstiş edəcəm. Burda mənim ayrı-seçkilik salmağa haqqım yoxdur. Harada Azərbaycan bayrağı varsa, ora məndən sonsuz dəstək var.

-Amma yenə də xüsusi marağınız olduğu hansısa idman növü olmamış olmaz.
-Var, amma yenə deyirəm, mənim xüsusi maraqlarım Azərbaycan maraqları qarşısında sönür.

Nərmin