Döyüşlər yenidən şiddətləndi - Rus ordusu bütün təmas xətti boyunca hücuma keçdi

Rusiya qoşunları Donetsk və Luqansk vilayətlərinin ərazisinə tam nəzarəti ələ keçirmək və müvəqqəti işğal olunmuş Krımla quru dəhlizini saxlamaq məqsədilə şərq əməliyyat zonasında hücum əməliyyatlarını dayandırmır.

Teleqraf.com xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.

Məlumata görə, rus qüvvələri Slobojanski istiqamətində Xarkov və Protopopivkaya artilleriya və minaatan mərmiləri atıb, Xarkov vilayətinin Barvinkovski rayonunun Kutuzivka və Oleksandrivka yaşayış məntəqələri ərazisində hava kəşfiyyatı aparıb.

Rus qoşunları Dovgenke kəndi istiqamətində hücum əməliyyatları keçirməyə cəhd etsələr də, buna nail ola bilməyiblər. Eyni zamanda, Donetsk və Tavriya istiqamətlərində Ukrayna qoşunlarının bölmələrinə hücum başlayıb.

Rusiya ordusu Liman istiqamətində Şandrıqolove kəndi istiqamətində irəliləyir, döyüşlər davam edir. Eləcə də Popasnaya istiqamətində də hücum var.

Rus qoşunları Mariupolun Azovstal ərazisində Ukrayna qüvvələrinin mövqelərinə hava zərbələri endirməkdə və atəşə tutmaqda davam edir. Zaporojye istiqamətində Orixov yaşayış məntəqəsi istiqamətində hücum əməliyyatları keçirilsə də, nəticəsiz qalıb.

Ruslar Ukrayna qüvvələrinin mövqelərini və istehkamlarını məhv etmək üçün bütün təmas xətti boyu artilleriya, reaktiv yaylım atəşi sistemləri və tanklardan istifadə edib. Tomina Balka kəndi yaxınlığında döyüşlər şiddətlənib.

Bessarabiya istiqamətində vəziyyət gərgin olaraq qalır.

Rusiya-Ukrayna sərhədinin mühafizəsinin gücləndirilməsi çərçivəsində Bryansk vilayətinin “Novi Yurkoviçi”, “Poqar” və “Lomakovka” nəzarət-buraxılış məntəqələri ərazilərində Rusiya Silahlı Qüvvələrinin Mərkəzi Hərbi Dairəsindən olan bölmələri yerləşdirilib.

Məlumata görə, ötən gün Ukrayna Hərbi Hava Qüvvələri və Quru Qoşunlarının hava hücumundan müdafiə bölmələri rusların 7 pilotsuz təyyarəsini və 8 qanadlı raketini vurub.

Donetsk və Luqansk vilayətlərində son 24 saat ərzində rus ordusunun 12 hücumu dəf edilib, altı tank, beş artilleriya sistemi, 15 ədəd zirehli döyüş maşını və 9 ədəd digər texnikası məhv edilib. Rus ordusu digər ərazilərdə də itki verib.