Bayden bu ölkə liderilə Yaxın Şərqdəki vəziyyəti müzakirə etdi

ABŞ prezidenti Co Bayden Böyük Britaniyanın Baş naziri Kir Starmer, Almaniya kansleri Olaf Şolts, İtaliyanın Baş naziri Corca Meloni və Fransa lideri Emmanuel Makron ilə Yaxın Şərqdəki vəziyyəti müzakirə edib.

Teleqraf.com xarici mətbuata istinadən xəbər verir ki, bu barədə Ağ Evin Milli Təhlükəsizlik Şurasının strateji kommunikasiyalar üzrə koordinatoru Con Kirbi brifinqdə bildirib.

“Düşünürəm ki, siz artıq israilli həmkarlarımızın təhlükələri ilə bağlı bəyanatlarını görmüsünüz - onlar İranın hücumu haqda getdikcə daha çox düşünürlər. Mən sizə deyərdim ki, biz bu narahatlıqları bölüşürük və buna görə də israilli və regiondakı digər həmkarlarımızla daimi əlaqə saxlayırıq.

Buna görə də prezident Bayden ötən gün Böyük Britaniya, Fransa, Almaniya və İtaliyadan olan həmkarları ilə danışıb”, - deyə Con Kirbi bildirib.

Tərəflər gərginliyin azaldılması, atəşkəs və Qəzza zolağında girovların azad edilməsi ilə bağlı razılığın əldə edilməsi istiqamətində davam edən səyləri müzakirə ediblər. Ağ Ev rəsmisinin sözlərinə görə, Vaşinqton administrasiyası Yaxın Şərqdəki vəziyyəti və orada artan gərginliyi diqqətlə izləyir.