Qərbin seçimi Azərbaycan oldu, dəhliz belə işləyəcək - Minasyan

Avropa ölkələri və ABŞ Şərqlə Qərb arasındakı nəqliyyat dəhlizlərində Azərbaycan marşrutuna üstünlük verir.

Teleqraf.com xəbər verir ki, bunu erməni keçmiş deputat Qaqik Minasyan deyib.

“Son vaxtlar tez-tez Türkiyədən bəyanatlar gəlir ki, Ermənistan Ankaranın şərtləri əsasında Azərbaycanın əsas hissəsi ilə Naxçıvan arasında Zəngəzur dəhlizini açmasa, bu əlaqəni İran ərazisindən təmin etmək variantına üstünlük verəcək.

Çindən Avropaya - Şərq-Qərb quru əlaqəsi ilə bağlı üç variant var: Rusiya və İran, həmçinin Xəzər dənizi - Azərbaycan üzərindən (Orta dəhliz). Orta dəhliz vasitəsilə rabitənin təşkilində problem odur ki, dəmir yolu ilə daşınan mallar Xəzər dənizində gəmilərə yüklənməlidir. Buna baxmayaraq, Avropa ölkələri Şərq-Qərb layihəsində Rusiya və İran yox, Azərbaycan marşrutuna üstünlük verirlər”, - siyasətçi bildirib.

Minasyanın fikrincə, Mehridən (Zəngəzur) keçəcək dəhlizin açılmasıyla yolun qısaldılması Qərb üçün vacibdir. Onun sözlərinə görə, Qərb dövlətləri xəttin İrandan keçməsində maraqlı deyillər.