Bakıda sərnişin avtobusu qatarla toqquşdu: yaralı sayı 33-ə çatdı - Yeniləndi

Binə qəsəbəsində sərnişin avtobusu ilə qatarın toqquşması nəticəsində xəsarət alanların sayı 33-ə çatıb.

Səhiyyə Nazirliyinin mətbuat xidmətinin mütəxəssisi Səfayə Əhmədova Teleqraf.com-a bildirib ki, yaralılardan 2-si Elmi-Tədqiqat Travmatologiya və Ortopediya İnstitutuna, 3-ü 1 saylı Kliniki Tibbi Mərkəzə yerləşdirilib.

Səfayə Əhmədova qeyd edib ki, 28 nəfər Sabunçu xəstəxanasına yerləşdirilib, onlardan biri olan azyaşlı uşaq xəstəxanaya çatdırılarkən ölüb.

O qeyd edib ki, yaralıların əksəriyyətinin vəziyyəti ağırdır.

***

Xəzər rayonu Binə qəsəbəsində qatarla avtobusun toqquşması nəticəsində yaralananların sayı artıb.

Səhiyyə Nazirliyinin mətbuat xidmətinin mütəxəssisi Səfayə Əhmədova Teleqraf.com-a bildirib ki, ümumilikdə hadisə nəticəsində bu dəqiqəyə olan məlumata görə, 26 nəfər yaralanıb.

“Yaralıların 22-si Sabunçu rayon 3 saylı şəhər xəstəxanasına yerləşdirilib. Xəstəxanaya yerləşdirilənlərin 6-sı uşaq olub. Qəza nəticəsində yaralanan uşaqlardan 1-i dünyasını dəyişib. Hazırda 5 uşaq 3 saylı şəhər xəstəxanasındadır, onlar 6, 10, 12 və 16 yaşlarındadır”.

***

Heydər Əliyev Beynəlxalq Hava Limanından Binə qəsəbəsinə aparan yol bağlanıb.

Binə qəsəbəsində ağır yol qəzası ilə əlaqədar Əli İsazadə küçəsi hərəkət tamamilə dayandırılıb.

Hazırda 160 saylı marşrut xətti ilə hərəkət edən avtobusun qatarla toqquşduğu ərazidə araşdırma aparılır.

***

15:32

Azərbaycan Dəmir Yolları Qapalı Səhmdar Cəmiyyəti Bakıda sərnişin avtobusunun qatarla toqquşması ilə bağlı məlumat yayıb.

Qurumdan Teleqraf.com-a verilən məlumatda bildirilir ki, bu gün günorta saatlarında Binə mənzilində ağır qəza hadisəsi baş verib.

Təxminən 14.35 radələrində 160 saylı marşrut avtobusu həmin ərazidəki qorunan dəmiryolu keçidində yük qatarı ilə toqquşub. İlkin məlumata görə, xəsarət alanlar var.

Hadisə ilə bağlı araşdırma aparılır.

***

Bakı Nəqliyyat Agentliyi (BNA) avtobusla qatarın toqquşması ilə bağlı məlumat yayıb.

Agentlikdən Teleqraf.com-a verilən məlumata görə, 01.10.2018-ci il tarixində 160 nömrəli müntəzəm marşrut xətti üzrə hərəkət edən "10-TG-106" dövlət qeydiyyat nişanlı sərnişin avtobusu Xəzər rayonu, Binə qəsəbəsində hərəkətdə olan qatarla toqquşub.

Bakı Nəqliyyat Agentliyinin məsul şəxsləri hazırda hadisə yerindədir.

***

14:49

Bakıda sərnişin avtobusu qatarla toqquşub.

Teleqraf.com unikal.org-a istinadən xəbər verir ki, hadisə paytaxtın Xəzər rayonu Binə qəsəbəsində baş verib.

Belə ki, 160 saylı marşurut xətti ilə hərəkət edən içərisi sərnişinlə dolu avtobus hərəkətdə olan qatarın yoluna çıxıb. Nəticədə qatar avtobusu vurub.

Ölən və yaralananlar var.