Tovuzda oğurluq edən şəxs polisə xəsarət yetirdi

Tovuz rayonunda oğurluğa cəhd edən şəxs polisə hücum edib.

Teleqraf.com xəbər verir ki, hadisə aprelin 4-də, gecə saat 1 radələrində Tovuz rayonunun Qovlar qəsəbəsi ərazisində baş verib.

Həmin vaxt naməlum şəxs Dönük Qırıqlı kənd sakini Ə.Həsənovun “Lexus” markalı avtomobilindən şüşəni sındırmaq yolu ilə oğurluğa cəhd göstərib.

Bu zaman səsə-küyə gəlmiş polis serjantı N.Həsənov şübhəli şəxsi saxlayarkən o, polis əməkdaşının əl nahiyəsinə metal alətlə xəsarət yetirib və qaçmağa cəhd göstərib.

Lakin görülmüş tədbirlərlə həmin şəxs saxlanılıb.

Araşdırmalarla onun Qovlar şəhər sakini, əvvəllər oğurluğa görə məhkum olunmuş A.Qasımov olması müəyyən edilib.

Faktla bağlı cinayət işi başalnıb.