Şəkidə evi və maşını qəsdən yandıran şəxs saxlanıldı -

Şəki rayonunun Baş Zəyzid və Vərəzət kəndləri ərazisində bir fərdi yaşayış evi, həmin evin həyətində olan “VAZ-2106” markalı avtomobil və iki tövlə yanıb.

Bu barədə DİN-in Mətbuat Xidmətinin Şəki regional qrupunundan Teleqraf.com- məlumat daxil olub.

Şəhər-Rayon Polis Şöbəsinin və FHN-in Dövlət Yanğından Mühafizə Xidmətinin əməkdaşları hadisə yerlərinə cəlb edilib, yanğının ətrafa yayılmasının qarşısı alınıb.

Hadisə zamanı ev sakinləri olan 3 nəfər müxtəlif dərəcəli yanıq xəsarətləri alıb, tövlələrdə olan ümumilikdə 7 baş iribuynuzlu mal-qara tələf olub, eləcə də 1 400 ot bağlaması yanıb.
İlkin araşdırmalar zamanı yanğının qəsdən törədildiyi müəyyən edilib.

Birgə keçirilmiş əməliyyat-istintaq tədbirləri nəticəsində hadisəni törətməkdə şübhəli bilinən Rahib Tağıyev saxlanılıb və o, ifadəsində əməlini etiraf edib.

Faktla bağlı Şəki rayon Prokurorluğunda Cinayət Məcəlləsinin müvafiq maddələri ilə cinayət işi başlanılıb.