“ÇL-də oynadığımızı bu gün hiss etdik” – Qurban Qurbanov

“Bu gün futbolçularımız və azarkeşlərimiz alqışalayiq idilər. Tam nəticəyə oynayan komandamız və yaxşı azarkeşlərimiz var idi”.

Bu sözləri “Qarabağ”ın baş məşqçisi Qurban Qurbanov Çempionlar Liqasının pley-off mərhələsində “Kopenhagen”ə qalib gəldikləri oyundan (1:0) sonra keçirilən mətbuat konfransında deyib.

- Oyundan öncə də bildirmişdim ki, “Kopenhagen”ə qarşı oynamaq çətin olacaq və belə də oldu. Bir neçə şansımız olsa da, istifdə edə bilmədik. Düşünürəm ki, bu qələbə son nəticə deyil. Çünki “Kopenhagen” öz meydanında mükəmməl futbol oynayır. Bizi çətin 90 dəqiqə gözləyir. Çalıçacağıq ki, səfərdən başıyuxarı dönək”.

- 90 dəqiqə ərzində cəmi 1 əvəzetməyə əl atdınız. Bu, nə ilə bağlı idi?

- Məncə, hər şey yaxşı gedirdi. Sona yaxın daha yaxşı oyandıq, çox top saxladıq. Sonluq göstərdi ki, dəyişikliyə ehtiyac yoxdur.

- Rəqibin baş məşqçisi “Qarabağ”ın şanslarını yüksək dəyərləndirdi. Bu fikirlə razısınızmı?

- Bu komanda belə hesaba hazır komandadır. Bilirsiniz ki, “Kopenhagen” “Vardar”la ilk oyunda məğlub olsa da, cavab oyununda böyükhesablı qələbə qazandı. Qol vursaq da, arxayınlaşmırıq. Məncə, şanslar bərabərdir.

- Rəqibi oyundan öncə analiz etmişdiniz. Gözləmədiyiniz nəsə baş verdi?

- Demək olar ki, nəyi düşünmüşdüksə, onun da şahidi olduq. Biz rəqibin oyununu canlı da izləyə bilərdik, amma onlar başqa futbol oynaya bilərdilər. Bu gün rəqibi daha yaxından tanıdıq və düşündüyümüzdən daha artığını gördük.

- Hakim idarəçiliyindən razı qaldınızmı?

- Mən həmişə idarəçilikdən razı qalmışam. Hakimlik çox çətin peşədir. Hər bir hakimə daha rahat oyun idarə etməyi arzulayıram. Onlar meydanda sakit olmalıdırlar ki, yaxşı oyun idarə etsinlər.

- İlk hissədə Şehiç oyuna daha çox qoşulurdu. Bu, sizin tapşırığınız idi?

- Buna hazırlaşmışdıq. Çünki rəqib 2 hücumçu ilə oynayırdı. Buna görə də, Şehiçdən “joker” kimi istifadə edirdik. Ümumən, pis alınmadı. Bu, bizim üçün vacib element idi.

- Dino Ndlovunu çempionat oyununda ehtiyatda saxlayıb, "kopenhagen"lə cavab matçı üçün qorumaq fikriniz var?

- Ndlovunun durumu yaxşıdır. Ciddi problemə oxşamır. Əgər kiçik zədəsi olsa, ona mütləq istirahət verəcəyik. 1-2 günə kiçik zədəsi olan futbolçuların durumuna aydınlıq gələcək.

- Komandanın ən yeni tarix yazmasına bir addım qalıb. Futbolçular arxayınlaşa bilər. Bu baxımdan “Slovan”la oyun “Qarabağ” üçün dərs ola bilərmi?

- Bizim üçün hər oyun və hər bir məğlubiyyət təcrübədir. İldən-ilə komandanın təcrübəsi daha da artır. Sadəcə, bizdə Çempionlar Liqası təcrübəsi yoxdur. Məncə, futbolçular "böyüyüblər", inkişaf ediblər. Cavab oyununa qədər bütün səhvlərimizi analiz etməliyik.

- Çempionlar Liqasının himnini eşitmək Qurban Qurbanov üçün nə deməkdi?

- Mənim üçün məndən daha çox vacib sizlərin eşitməsi oldu. Amma açığı, duyğulandım. Belə bir turnirə addım atmış olduq. Düzdü, Çempionlar Liqasında öncə oynasaq da, bu gün turnirdə mübarizə apardığımızı hiss etdik. Bu himni Azərbaycan xalqına hiss etdirdiyimiz üçün sevinirik.

- Karluş Embalonun “Qarabağ”a transfer olunacağı deyilir. Bu məsələ doğrudur?

- Bir neçə futbolçu ilə danışıq aparırıq. Hətta futbolçuların məxsus olduqları klublara pul da təklif etmişik. Amma əfsuslar olsun ki, hələlik heç nə alınmayıb.

- Matçın sonlarında ehtiyat oyunçuların geyindiyi “nakitka”dan istifadə etdiniz. Səbəb nə idi?

- Dördüncü hakim belə istədi. Komanda ilə oxşar geyimdə olduğumu bildirdi. Ona geyimimin göy rəngdə olduğunu desəm də, fikrini dəyişmədi. Buna görə də, o qədər də xoşlamasam da, “nakitka” geyinməli oldum.

- Növbəti oyunları Olimpiya Stadionunda keçirə bilərsizmi?

- Biz bu stadiona öyrəşmişik. Amma dəqiq bir söz deyə bilmərəm. Bunu gələcək göstərəcək.

- Transferlərlə bağlı çalışmalar nə yerdədi?

- Axtarışlar davam edir. Bir neçə futbolçunun klubuna da transfer pulu təklif etmişik. Əfsuslar olsun ki, hələ alınmır.

/qol.az/