Rusiyada kino təhsili almaq istəyənlərə MÜJDƏ

Azərbaycanlı gənclər kino təhsili almaq üçün Ümumrusiya Kinematoqrafiya Universitetinə (VQİK) göndəriləcək. Kino və televiziya rejissoru ixtisası üzrə 2, kinooperator 2, animasiya və kompüter qrafikası rejissoru ixtisası üzrə isə 1 yer ayrılıb.

Teleqraf.com xəbər verir ki, bu fikirlər Nizami Kino Mərkəzində keçirilmiş mətbuat konfransında səslənib. Mədəniyyət və Turizm Nazirliyinin kinematoqrafiya şöbəsinin sektor müdiri Yusif Şeyxov və Cəfər Cabbarlı adına “Azərbaycanfilm” kinostudiyasının direktoru Müşfiq Hətəmov şərtlər barədə ətraflı məlumat verib.

Daha hazırlıqlı namizədləri müəyyən edib onları Moskvaya qəbul imtahanlarına göndərmək məqsədilə Azərbaycan Respublikası Kinematoqrafçılar İttifaqı və “Azərbaycanfilm” kinostudiyasının iştirakı ilə seçim komissiyası yaradılıb. Namizədlər üçün məsləhət saatları təyin olunacaq.

Abituriyentlərin lazım olan sənədləri rus dilində 15 iyunadək “Azərbaycanfilm” kinostudiyasına təqdim etmələri tələb olunur. Hər bir ixtisas üzrə lazım olan sənədlərin siyahısı ilə www.vgik.info internet səhifəsində tanış olmaq olar.

Nərmin