5 Dekabr 2020 11:50
438

Siyasətdə sağlam münasibətlərin dəstəklənməsi və dialoq mühitinin təşviqi məqsədilə Azərbaycan iqtidarı davamlı olaraq müxtəlif təşəbbüslər ilə çıxış edir. Prezident cənab İlham Əliyevin ölkənin yeni siyasi konfiqurasiyasının formalaşması siyasətində “sağlam dialoq” məfhumu xüsusi yer tutur. Təqdirəlayiq haldır ki, ölkədə fəaliyyət göstərən siyasi partiyalarının mütləq əksəriyyəti həmin dialoqunun fəal iştirakçılarıdır. Etiraf olunmalıdır ki, siyasi münasibətlərdə dialoq mühitinin yaşanması konkret ölkənin demokratik ənənələrinin formalaşmasına zəmin yaradır.

Məlumat verdiyimiz kimi, Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyevin davamlı şəkildə partiya rəhbərləri və ictimai fəallar ilə görüşləri təşkil olunur. Mövcud səpgidə növbəti görüşlər ayrı ayrılıqda videokonfrans formatında cari ilin 4 dekabr tarixində Böyük Azərbaycan Partiyasının sədri Elşad Musayev, Azərbaycan Demokratik Maarifçilik Partiyasının sədri Elşən Musayev və Vəhdət Partiyasının sədri Tahir Kərimli, həmçinin Azərbaycan Sosial Rifah Partiyasının sədri Əsli Kazımova ilə keçirilmişdir.

Görüşlərdə Vətən müharibəsində əldə olunmuş böyük qələbə, ordumuzun şücaəti, müharibədə iştirak etmiş və yaralanmış hərbiçilərə dövlət qayğısı, işğaldan azad olunmuş ərazilərə əhalinin məskunlaşması, siyasi həmrəylik istiqamətində əldə olunmuş uğurların qorunmasında partiyaların rolu, islahatların şaxələnməsi, siyasətdə qadın faktoru və gender məsələləri ilə bağlı mövzular, həmçinin COVİD-19 pandemiyası ilə mübarizədə vətəndaşların fəallığı, VI çağırış Milli Məclisin fəaliyyəti və ölkənin siyasi gündəmində olan bir sıra digər önəmli mövzular da müzakirə edilmişdir.

Şanlı tariximizin unudulmaz və silinməz səhifələrindən olan Vətən müharibəsi ətrafında fikir mübadiləsi aparılaraq bildirilmişdir ki, əldə olunan qələbənin əsas səbəbkarları Müzəffər Ali Baş Komandan İlham Əliyev, Azərbaycan ordusu və daim öz Dövlət Başçının ətrafında bir yumruq kimi toplaşan böyük Azərbaycan xalqıdır. Cəmi 44 gün ərzində aparılmış döyüşlər nəticəsində ölkəmiz bütün dünyaya malik olduğu hərbi gücünü və iqtisadi qüdrətini aşkar şəkildə nümayiş etdirdi.

Müharibədən sonrakı dövrdə ölkəmizə qarşı aparılacaq sərt informasiya təzyiqlər ilə mübarizədə qalib gəlmək üçün bu gün Azərbaycanda yaşanan milli və siyasi həmrəyliyinin qorunması olduqca vacibdir. Bu səbəbdən siyasi partiyalar arasında sağlam münasibətlərin saxlanılması strateji vəzifədir. Administrasiyanın rəsmisi mövzunu inkişaf etdirərək, siyasi partiyaların rəhbərləri ilə təşkil olunan görüşlər zamanı Azərbaycan Respublikasının Prezidenti İlham Əliyevin 1 dekabr tarixli qələbə nitqinə müraciət edərək sözügedən çıxışdan sitat gətirmişdir: “Bizim ölkəmiz üçün yeni dövr başlayır. Yeni quruculuq dövrü, inkişaf dövrü, azad edilmiş ərazilərimizin bərpası dövrü. Mən tam əminəm ki, Azərbaycan xalqı bu dövrdə də birlik, həmrəylik göstərəcək, güclü iradə göstərəcək. Azərbaycan xalqı yenə də birləşərək dağıdılmış bu şəhərləri, kəndləri bərpa etmək üçün əlindən gələni edəcəkdir. Biz bundan sonra böyük və qürurlu xalq kimi yaşayacağıq. Beynəlxalq müstəvidə öz sözümüzü demişik, bölgədə öz sözümüzü demişik. İstədiyimizə nail olmuşuq və əminəm ki, bundan sonra bizim xalqımızı təhlükəsiz və xoşbəxt həyat gözləyir.” Cənab Prezidentin bu sözləri cəmiyyətimizdə olan bütün potensialının səfərbər olunması kimi vacib vəzifəni qarşımızda müəyyən etdiyini vurğulayan Ə.Vəliyev, Azərbaycanın hər bir vətəndaşı bu amallara xidmət etməsinin vacibliyini bildirmişdir.

Görüşlər əsnasında Vətən müharibəsində şəhidlərin qanı hesabına əldə olunmuş qələbənin əhəmiyyətini bəzi qüvvələrin ucuzlaşdırma cəhdləri sərt tənqid olunmuş və bu kimi hallar yalnız öz doğma xalqına və vətəninə qarşı xainlik kimi qiymətləndirilmişdir. Ə.Vəliyev vurğulamışdır ki, düşmənin mülki əhalini atəşə tutmasını da unutmaq olmaz və bu kimi faktların beynəlxalq ictimaiyyətin diqqətinə çatdırmaq prinsipial vəzifədir.

Ölkənin siyasi fəalları ilə təşkil olunan görüşlər çərçivəsində başlamış islahatların gözlənilən növbəti mərhələləri də müzakirə olunmuşdur. İslahatların effektivliyi naminə vətəndaş cəmiyyətinin institutlarından fəallıq tələb olunduğunu bildirən Ə.Vəliyev vurğulamışdır ki, əlverişli mühitin yaradılması üçün Milli Məclis tərəfindən yaxın gələcəkdə mütləq olaraq mütərəqqi qanunlar işlənilib qəbul olunacaqdır.

Bütün bəşəriyyəti narahat edən COVİD-19 pandemiyası və müşahidə olunan tendensiyalar da görüşlər zamanı müzakirə edilmişdir. Ölkəmizdə cənab Prezidentin rəhbərliyi altında qəbul edilmiş qərarlar nəticəsində koronavirusa yoluxma sayı mümkün qədər minimal səviyyədə saxlanılmışdır. COVİD-19 qarşı vaksınaların hökumət tərəfindən Azərbaycana gətirilməsi və əhalinin peyvənləşdirilməsi məsələləri də müzakirə olunmuşdur.

Siyasi partiyaların fəallığının artırılması məsələləri də görüşlər zamanı xüsusi olaraq müzakirə olunmuşdur. “Ölkəmizdə mövcud olan siyasi partiyaların sayı Azərbaycanda yaşanan siyasi plüralizmdən bilavasitə xəbər verir” – fikrini səsləndirən Ə.Vəliyev vurğulamışdır ki, Azərbaycanda demokratik münasibətlərin inkişafı naminə partiyalara hökumət tərəfindən ayrılan diqqət daha da artacaqdır.

Müzakirələr zamanı Elşad Musayev, Elşən Musayev, Tahir Kərimli və Əsli Kazımova Azərbaycan Respublikasının Prezidenti İlham Əliyevin “Zəfər Günü”, “Anım Günü”, həmçinin Vətən müharibəsində Qələbə ilə bağlı müvafiq orden və medalların təsis olunması, habelə Bakı şəhərində Vətən müharibəsi memorial kompleksi və Zəfər muzeyinin yaradılması ilə bağlı qərarlarını yüksək qiymətləndirmiş və bu cür ali təşəbbüslərin böyük qələbənin əbədiləşdirməyə xidmət edəcəyini vurğulamışdılar. Noyabrın 10-nun Türkiyədə Mustafa Kamal Atatürkün anım günü olduğunu nəzərə alaraq, Azərbaycan Respublikasında Zəfər Gününün tarixinin dəyişdirilməsi də partiya sədrləri tərəfindən alqışlanmışdır.

Görüşə görə öz təşəkkürlərini bildirən siyasilər dövlətçiliyimizin, iqtidar-müxalifət arasında dialoqun və yeni siyasi konfiqurasiyanın inkişafında hər zaman dəstək olacaqlarını bildirmişlər.


Müəllif: Teleqraf.com