Müasir Azərbaycan gəncliyi: Zəfərə imza atan qalib dövlətin qürurlu vətəndaşı - Deputat

Əsası ümummilli lider Heydər Əliyev tərəfindən qoyulmuş dövlət gənclər siyasəti Azərbaycan gəncliyinin inkişafında dərin izlər buraxıb. Ulu Öndərin 1997-ci il fevralın 2-də imzaladığı fərmana əsasən, fevralın 2-si Azərbaycan Gəncləri Günü elan edilib. Həmin vaxtdan etibarən bu gün MDB məkanında və Şərqi Avropa ölkələri arasında ilk dəfə olaraq Azərbaycanda təntənəli şəkildə qeyd edilməyə başlanıb. Ümummilli lider Heydər Əliyev gənclərə həmişə böyük diqqət və qayğı ilə yanaşıb, onların problemlərinin həlli istiqamətində həyata keçirilən tədbirlərə xüsusi önəm verib, bu siyasəti müasir müstəqil Azərbaycan dövlətinin fəaliyyətinin ən mühüm istiqamətlərindən biri kimi dəyərləndirib. Ulu öndərin layiqli davamçısı Müzəffər Ali Baş Komandan, Prezident İlham Əliyev tərəfindən dövlət gənclər siyasəti uğurla həyata keçirilir. Bu gün ölkəmizdə bütün sahələrdə gənclərin aktiv rol oynaması gənclər siyasətinin uğurla reallaşdırıldığının bariz örnəyidir.

Bunu Teleqraf.com-a Milli Məclisin deputatı Tamam Cəfərova deyib.

Deputat bildirib ki, bu gün ölkəmizdə gənclər siyasəti mahiyyət və keyfiyyətcə yeni mərhələsini yaşayır. Əsası ümummilli lider Heydər Əliyev tərəfindən qoyulmuş dövlət gənclər siyasətinin Prezident İlham Əliyevin uğurla davam etdirməsinin nəticəsidir ki, bu gün Azərbaycan gəncləri bütün sahələrdə özlərini doğruldub, ölkəmizi dünya miqyasında layiqincə təmsil etməyi bacarıblar. Ölkəmizdə gənclərin hərtərəfli inkişafı, onların düzgün yetişdirilməsi, milli-mənəvi dəyərlərə sadiqlik və vətənpərvərlik ruhunda tərbiyəsi dövlət başçısı tərəfindən daim diqqət mərkəzində saxlanılıb. Gənclərin mənəvi inkişafı, vətənpərvərlik tərbiyəsi, xarici ölkələrdə təhsili, sosial müdafiəyə ehtiyacı olanların problemlərinin həlli istiqamətində görülən işlər, gənclər təşkilatlarının formalaşması və inkişafı üçün yaradılan şərait və imkan bu sahəyə böyük diqqətin nəticəsidir.

Millət vəkili bildirib ki, bu gün cəmiyyətimizin böyük hissəsini təşkil edən gənclər ölkəmizin həyatında çox önəmli rol oynayır: “Gənclərin təşəbbüsləri, onların əməyi bu gün hər yerdə görünməkdədir. Prezident İlham Əliyevin hakimiyyətdə olduğu dövr ərzində Azərbaycanda vətənpərvər, sağlam düşüncəli və gələcəyimizi etibar edə biləcəyimiz gənc nəsil yetişib. Ölkəmizdə həyata keçirilən gənclər siyasətində milli və dövlətçilik maraqlarının prioritet olması 44 günlük Vətən müharibəsində həlledici rol oynadı. Müharibədə əsas missiyanı məhz Ali Baş Komandan İlham Əliyevin prezidentliyi dövründə yetişən gənclər yerinə yetirdilər. Məhz Azərbaycan Prezidentinin gənclər siyasətinin uğurlu olamasının nəticəsi idi ki, elə Prezident İlham Əliyevin hakimiyyəti dövründə yetişən gənclik tarixi qələbəmizin əldə olunmasında digər nəsillərlə bərabər əvəzsiz rol oynadı. Bu gün də istər idarəetmə sahəsində, istərsə də ölkəmizin sosial-iqtisadi, elmi-mədəni və ictimai həyatında gənclər aparıcı rol oynamaqdadırlar ki, bu da xalqımızın gələcək inkişafının təmin olunmasında, azad edilən torpaqlarımızda görüləcək quruculuq-abadlıq işlərində, doğma diyarımızın yenidən çiçəklənməsində iştirakı baxımından mühüm əhəmiyyət kəsb edir. Azərbaycan gənclərinin ölkə həyatında yüksək fəallığı, vətənpərvərliyi, dövlətə və Vətənə bağlılığı gənclərimizin bu prosesdə də fəal iştirak edəcəklərini deməyə güclü əsas yaradır.

Xatırladaq ki, Laçın-Xankəndi yolunda ekoloji terrora qarşı Azərbaycan gəncləri birlik nümayiş etdirərək, əzm və qətiyyətlə əlli gündən çoxdur dinc aksiya keçirirlər. Xankəndi-Laçın yolunda davam edən aksiya postmüharibə dövründə Qarabağla bağlı ən mühüm proseslərdən biridir. Burada ən mühüm olanı isə ekoloji terrora qarşı QHT-lərin timsalında gənclər birlik nümayiş etdirərək bütün dünyanı ekologiyanı qorumağa çağırır, Azərbaycana məxsus təbii sərvətlərin qanunsuz istismarının qarşısının alınmasına, ekoloji terrora son qoyulmasına çağırış edirlər. Bu aksiya Azərbaycan gənclərinin vətənpərvərliyinin ən bariz örnəyidir. Gənclərimiz təbii sərvətlərimizə sahib çıxaraq dinc aksiya mədəniyyətinin necə olduğunu həm Ermənistana, həm də onların havadarlarına növbəti dəfə nümayiş etdirirlər. QHT-lər tərəfindən milli birlik modeli bütün dünyaya ən uğurlu şəkildə nümayiş olunur. Aksiya iştirakçıları təkcə öz fikirlərini ifadə etmir, həm də Azərbaycan xalqının milli mənafeyini və haqlı tələblərini ortaya qoyurlar. Beynəlxalq aləmin bu aksiyaya susqunluq nümayiş etdirməsi insanda haqlı bir hiddət hissi doğurur. Lakin bu etinasızlıq qətiyyətli Azərbaycan gənclərinin iradəsini qıra bilməz. Bu gün hər bir Azərbaycan gənci dövlətimizin ali maraqları, ölkəmizin suverenliyini və ərazi bütövlüyünü qorumaq üçün əlindən gələn hər şeyi etməlidir və edir. Gənclər Ulu Öndər Heydər Əliyevin onlarınqarşısında qoyduğu tarixi vəzifəni uğurla yerinə yetirirlər. Azərbaycan gənclərinin I Forumunda Ulu Öndər Heydər Əliyev demişdir: “Hər bir Azərbaycan gənci hər şeydən çox, hər şeydən artıq müstəqil Azərbaycanın bu günü, gələcəyi haqqında düşünməlidir”.

Tamam Cəfərova bildirib ki, indiki gənclər üçün imkanlar daha genişdir: “Gənclər bu imkanlardan istifadə etməlidir. Bu gün Azərbaycan inamla irəliyə baxır, ölkə qarşısındakı əsas vəzifələr öz həllini tapıb. Azərbaycan gəncləri azad, sabitlik hökm sürən, özünə güvənən ölkədə yaşayır. Azərbaycan gənci haqlı olaraq fəxr edir ki, bu ölkənin vətəndaşıdır. Bu mənada gənclərimiz də öz gələcək həyatını düzgün müəyyən etmək üçün və dövlətə maksimum xeyir vermək üçün fəal olmalıdır”.