Bakıda vacib forum: “COP29 və Azərbaycan üçün Yaşıl Baxış” - Millət vəkili açıqladı

Müasir beynəlxalq münasibətlər sistemində etibarlı tərəfdaş kimi tanınan Azərbaycan Cənubi Qafqaz regionunun lider dövləti olmaqla yanaşı, bölgənin iqtisadi, siyasi və humanitar mərkəzi kimi çıxış edir. Şübhəsiz ki, bunu təmin edən başlıca strateji faktor həyata keçirilən uğurlu daxili və xarici siyasət kursudur. Prezident İlham Əliyevin uğurlu siyasətinin nəticəsidir ki, artıq Azərbaycan beynəlxalq tədbirlərin keçirildiyi mühüm məkana çevrilib. Bu tədbirlərdən biri də ADA Universitetində təşkil olunan və müxtəlif beyin mərkəzlərinin iştirak etdiyi “COP29 və Azərbaycan üçün Yaşıl Baxış” mövzusunda beynəlxalq forumdur. Azərbaycanın COP29-a ev sahibliyi etdiyi vaxtda belə bir beynəlxalq forumun ölkəmizdə təşkil olunması olduqca mühüm əhəmiyyət kəsb edir. Forum çərçivəsində Prezident İlham Əliyev sualları cavablandırarkən daxili və xarici auditoriyaya mühüm mesajlar verib. Ölkə Başçısı COP29-un Azərbaycanda keçirilməsinin ölkəmiz üçün əhəmiyyətini və eləcə də, ənənəvi və bərpa olunan enerji sahəsində qazanılan uğurlara xüsusilə diqqət çəkib.

Bunu Teleqraf.com-a Milli Məclisin deputatı Tamam Cəfərova deyib.

O qeyd edib ki, Prezident İlham Əliyevin qətiyyətli, uzaqgörən, praqmatik siyasətinin nəticəsində ölkəmiz dünyada etibarlı tərəfdaş kimi mövqeyini möhkəmləndirib: “COP29 beynəlxalq tədbirin Azərbaycanda keçirilməsi ilə əlaqədar beynəlxalq ictimaiyyət tərəfindən verilən yekdil qərar da bunun əyani sübutudur. Prezidentin forum da dediyi kimi “COP29 beynəlxalq ictimaiyyət tərəfindən Azərbaycana olan böyük ehtiramın və dəstəyin göstəricisidir”. Ölkəmiz bu mötəbər tədbirə yüksək səviyyədə hazırlıq işlərini həyata keçirir. Şübhəsiz ki, COP29 çox böyük məsuliyyətdir. Burada söhbət təkcə təşkilati məsələlərdən deyil, nəticələrin əldə edilməsindən də gedir”.

Millət vəkilinə görə, Azərbaycan iqlim dəyişiklikləri ilə mübarizəyə olduqca böyük önəm verir və bu istiqamətdə mühüm tədbirlər həyata keçirir: “Bu baxımdan COP29 beynəlxalq tədbirinin iqlim dəyişiklikləri ilə mübarizə baxımından əhəmiyyətli olacağına əminik. Azərbaycanda ətraf mühitin mühafizəsinə böyük əhəmiyyət verilir. Cənab Prezident bu haqda çıxışında qeyd edib ki, “Ölkəmizdə 1994-cü ildən bəri bütün neft əməliyyatları beynəlxalq ətraf mühit mühafizəsi standartlarına əsasən aparılır. Bizim əsas investorlarımız dünyanın aparıcı enerji şirkətləridir və sözsüz ki, hər kəs onların ətraf mühitə diqqət yetirdiyinin yaxşı bir nümunə olduğunu bilir”. Şübhəsiz ki, burada ən mühüm məqamlardan biri də neft hasil edən bir ölkənin COP29-a ev sahibliyi etməsidir. Bu olduqca mühüm məqamdır. Azərbaycan ənənəvi enerji resurslarından ölkənin inkişafı, yoxsulluğun azaldılması, infrastruktur və yaşıl enerjiyə keçidin həyata keçirilməsi məqsədilə məharətlə istifadə edir. Ölkə başçısının da dediyi kimi “...Beləliklə, bu gün biz sabit neft və artan qaz hasilatına malikik, eyni zamanda, yaşıl enerji layihələrini inkişaf etdiririk...”

Deputat hesab edir ki, bu ölkəmizin gələcək inkişafı baxımından mühüm əhəmiyyət kəsb edən önəmli məqamdır: “Bununla yanaşı, Azərbaycan qazıntı yanacağı təchizatı istiqamətində həyata keçirdiyi layihələri daha da inkişaf etdirir. Beləki, Avropaya qaz təchizatının 2027-ci ildə 20 milyard kubmetrə qədər artması nəzərdə tutulur. Bu, ölkəmiz üçün bir hədəfdir. Bu il Avropaya qaz təchizatımız təqribən 12 milyard kubmetr olacaq. Bu, 2021-ci illə müqayisədə 4 milyard kubmetr çoxdur. Bütün bunlar Azərbaycanın enerji siyasətinin uğurlarıdır. Bu gün Azərbaycan Avropanın enerji təhlükəsizliyində mühüm rol oynayır”.

Tamam Cəfərova Prezident İlham Əliyevin forumdakı çıxışı və iştirakçıların suallarına verdiyi cavabları beynəlxalq münasibətlər sistemində baş verən proseslər və gələcək barədə mühüm çağırışları özündə ehtiva etdiyini söyləyib: “Ölkə başçısının bəhs etdiyi hər bir fikir Azərbaycanın qlobal miqyasda mövqeyinin və Cənubi Qafqaz regionunda yerinin nə qədər önəmli olduğunu göstərir. Ümumilikdə forum Azərbaycanın beynəlxalq siyasi arenada mühüm aktorlardan birinə çevrildiyini göstərmək baxımından mühüm əhəmiyyətə malikdir”.